HELPU OEDOLION HŶN I DDAL ATI I SYMUD
Wrth i'r cyfyngiadau dynhau dros y gaeaf bydd pawb yn treulio mwy o amser gartref ac yn ei chael yn anodd dod o hyd i'r cymhelliant, yr hyder a'r wybodaeth i ddal ati i symud a bod yn actif.
Mae gwarchod eich hun wedi'i ailgyflwyno, mae'n llawer oerach a thywyllach nag yn ystod y cyfyngiadau symud cyntaf a gan fod rhai cyfleusterau hamdden a chwaraeon yn parhau i fod ar gau i'r cyhoedd, mae dal ati i fod yn actif ac yn iach yn anodd iawn i oedolion hŷn. Mae ein hymchwil ni wedi dangos bod lefelau gweithgarwch corfforol oedolion dros 55 oed wedi gostwng yn ystod cyfnod cyntaf cyfyngiadau'r pandemig.
Ond mae bod yn actif mor bwysig i iechyd meddwl a chorfforol unigolyn – o roi hwb i'r system imiwnedd i helpu i ymladd feirysau fel y Coronafeirws a chodi hwyliau rhywun a fydd yn helpu i drechu unigrwydd ac iselder.Mae manteision dirifedi i fod yn actif.
SYNIADAU, CYMHELLIANT AC ADNODDAU AR GYFER CADW’N ACTIF
Rydyn ni wedi ymuno â’r sector a sefydliadau cenedlaethol i ddarparu rhywfaint o gyngor ac arweiniad ynghylch sut gall oedolion hŷn ddal ati i fod yn actif gartref – i ddiogelu eu hiechyd meddwl a chorfforol.
Ledled Cymru
- Mae Age Cymru yn argymell na ddylai oedolion hŷn eistedd yn llonydd am fwy nag awr oherwydd gall hyn gael effaith negyddol ar iechyd rhywun ac mae gan y mudiad adnoddau i helpu i arwain unigolion drwy ymarferion gartref, gan gynnwys Hyfforddiant Swyddogaethol Effaith Isel a Tai Chi
- Mae Sporting Memories, prosiect a gefnogir gan Chwaraeon Cymru, yn parhau i helpu pobl hŷn drwy’r pandemig drwy bŵer chwaraeon, ac yn cynnig amrywiaeth o fideos ymarfer ysgafn i helpu gyda chryfder ac ystwythder.
- Edrychwch ar fideos ymarfer ysgafn Chwaraeon Cymru – sy’n cael eu harddangos gan rai o sêr chwaraeon Cymru.
- Elderfit – yn darparu dosbarthiadau ymarfer ar-lein i bobl dros 50 oed am danysgrifiad misol.
- Prosiect Walking Friends Wales (gan Living Streets) – mae’n helpu i gefnogi pobl dros 50 oed i godi allan i’r awyr agored i gerdded, ar eu cyflymder eu hunain. Mae hyn yn cynnwys cysylltu pobl dros 50 oed â phobl eraill yn yr ardal i gyfarfod ei gilydd i gerdded (pan mae’n ddiogel gwneud hynny).
- Mae Pedal Power yn helpu pobl o bob oed i fynd ar gefn eu beic i ymarfer. Sylwer bod ffi am ymuno.
- Get Out Get Active – mae’n cael pobl anabl a heb anabledd i ddod at ei gilydd i gymryd rhan mewn gweithgarwch gyda’i gilydd, a mwynhau, pan mae’n ddiogel gwneud hynny.
Yn Eich Ardal Chi
- Diddordeb mewn Tennis? Chwiliwch am eich cynghrair senglau leol i oedolion yn ardal Caerdydd a’r Fro gyda Tennis Cymru
- Mae Chwaraeon ac Iechyd Abertawe yn cynnal amrywiaeth o weithgareddau awyr agored a rhithwir drwy gydol y Pasg. Ewch i’r wefan i weld yr amrywiaeth lawn o weithgareddau sydd ar gael.
- Mae Newport Live wedi lansio rhaglen newydd o weithgarwch i gefnogi pobl 60 oed a hŷn i gadw’n actif ac mewn cysylltiad. Mae hyn yn cynnwys amserlen o Hyfforddiant Dwysedd Isel a fydd yn cael ei rhoi yn wythnosol ar dudalen Facebook a sianel YouTube Newport Live.
