Cyngor doeth i hyfforddwyr gwrywaidd sy'n cefnogi merched a genethod gydag iechyd merched mewn chwaraeon

2. Meithrin ymddiriedaeth i ddechrau 

Mae creu perthynas ddiogel o ymddiriedaeth yn sail i gyfathrebu ystyrlon – yn enwedig o amgylch pynciau sensitif.

“Rhaid meithrin perthynas a lefel o ymddiriedaeth cyn y gallwch chi gael sgyrsiau un i un neu wyneb yn wyneb. Mae gen i berthynas dda ac agored iawn gyda fy hyfforddwr gwrywaidd. A dweud y gwir, pan wnes i ddod i wybod fy mod i’n feichiog, ar ôl fy rhieni, ef oedd y person nesaf i ni ddweud wrtho.” - Bethan Davies, Cerddwr Rasys Rhyngwladol.

3. Creu gofod ar gyfer sgyrsiau agored 

Gall trafodaethau grŵp neu brofiadau a rennir helpu i gael gwared ar y stigma sy'n ymwneud â phynciau iechyd merched a meithrin hyder ymhlith athletwyr benywaidd.

4. Bod yn gyfforddus yn siarad am iechyd merched 

Efallai y bydd siarad am y mislif, hormonau, neu lefelau egni yn teimlo'n lletchwith ar y dechrau – ond mae'r sgyrsiau yma’n bwysig.

“Cyn y sgwrs gyntaf, roeddwn i’n nerfus braidd. Ond yn y diwedd, fe drodd yn sgwrs eithaf braf y gallen ni adeiladu arni. Po fwyaf o sgyrsiau oedden ni’n eu cael, roedd yn bendant yn teimlo'n fwy cyfforddus.” – Mark Samuels, Uwch Ddarlithydd mewn Hyfforddi Chwaraeon ym Mhrifysgol Met Caerdydd a Hyfforddwr Trampolinio.

5. Gwrando ar eich athletwyr yn unigol 

Mae anghenion pob athletwr yn wahanol felly cofiwch wrando ac addasu. Dyna'n union beth mae Mark Samuels yn ei wneud wrth hyfforddi'r trampolinydd lefel hŷn o Gymru, India Marshall.

“Fe siaradodd India am brofiad roedd hi'n mynd drwyddo nad oeddwn i’n gwybod llawer amdano. Ar ôl hynny, roedd angen i mi wybod mwy. Yn ein sesiwn gynllunio ddiwethaf, fe gawson ni sgwrs am ba gyfnodau y byddai'r merched ynddyn nhw. Mae cael y sgyrsiau’n golygu y gallwn ni wneud yr hyfforddiant yn fwy croesawgar, yn hwyl ac yn werth chweil.” – Mark Samuels, Uwch Ddarlithydd mewn Hyfforddi Chwaraeon ym Mhrifysgol Met Caerdydd a Hyfforddwr Trampolinio. 

6. Siarad am Gylch y Mislif

Mae deall sut mae cylch y mislif yn effeithio ar berfformiad a lles yn allweddol i unrhyw hyfforddwr sy'n gweithio gydag athletwyr benywaidd.

“Mae’r mislif yn dal i fod yn bwnc tabŵ mewn chwaraeon elitaidd ac mae’n parhau i gael effaith negyddol ar ferched sy'n cystadlu ar y lefel uchaf. Mae angen i bawb yn y byd chwaraeon greu amgylchedd agored a chefnogol lle mae cyfle i siarad am gylch y mislif a'r mislif heb boeni am letchwithdod, cywilydd nac embaras.”

“Mae'r ymchwil yn dweud wrthyn ni fod bylchau mewn gwybodaeth am gylch y mislif, a'r hyn fedr helpu athletwyr i reoli eu symptomau, felly rydyn ni wedi creu modiwl e-ddysgu newydd yn ddiweddar i helpu hyfforddwyr ac athletwyr i ddysgu mwy am y pwnc.” – Dr Natalie Brown, Chwaraeon Cymru. 

Meddyliau i Gloi

Os ydyn ni eisiau i fwy o athletwyr benywaidd ffynnu, mae angen i ni greu amgylcheddau sy'n deall ac yn cefnogi eu hanghenion nhw. Mae iechyd merched yn rhan allweddol o hynny.

Drwy feithrin ymddiriedaeth, dechrau sgyrsiau am iechyd, a gwrando ar athletwyr benywaidd fel unigolion, gall hyfforddwyr gwrywaidd chwarae rhan enfawr wrth helpu athletwyr benywaidd i ffynnu.

Ble i ddechrau:    

Dilynwch y cwrs Cylch y Mislif mewn Chwaraeon am ddim i hybu eich gwybodaeth, chwalu stigma, a chreu amgylchedd hyfforddi lle gall merched a genethod ffynnu.