Gadael i Fyd Natur Ffynnu yng Nghlwb Pêl Droed Clarbeston Road

“Rydyn ni eisoes wedi gweld cynnydd mewn gweithgarwch gan bryfed ac adar yn yr ardal sydd wedi’i hadu ac rydyn ni’n obeithiol ein bod ni’n gwneud cyfraniad bach ond pwysig at fioamrywiaeth leol. Rydyn ni hefyd yn gobeithio, drwy ganiatáu ailhadu naturiol, y byddwn ni’n gallu cynnal y blodau gwyllt ar gyfer y blynyddoedd sydd i ddod.

“Mae manteision ymarferol wedi bod i ni hefyd gan ein bod ni’n arbed amser gwirfoddolwyr yn ogystal â chostau tanwydd heb orfod strimio’r clawdd yn rheolaidd. Gobeithio y bydd clybiau chwaraeon eraill sydd â llefydd tebyg ar gyfer dolydd blodau gwyllt yn ystyried gwneud yr un peth â ni.”

Mae Chwaraeon Cymru yn blaenoriaethu’r frwydr yn erbyn newid hinsawdd i sicrhau bod Cymru’n cynnal amgylchedd lle gall chwaraeon barhau i ffynnu ar gyfer cenedlaethau’r dyfodol. Mae gwarchod byd natur a bioamrywiaeth yn rhan allweddol o warchod yr amgylchedd, fel y dywed Emma Wilkins:

“Mae gan chwaraeon gysylltiad cryf â bioamrywiaeth gan fod llawer o weithgareddau yn dibynnu ar fannau gwyrdd, llynnoedd, afonydd, moroedd a choedwigoedd. Mae'n hollbwysig bod clybiau a sefydliadau chwaraeon yn helpu i ddiogelu byd natur a lleihau eu heffaith eu hunain ar yr amgylchedd. 



Mae’r gwaith sy’n cael ei wneud gan Glwb Pêl Droed Clarbeston Road yn enghraifft wych o sut gall clybiau chwaraeon yng Nghymru alluogi i fioamrywiaeth ffynnu yn eu cyfleusterau nhw eu hunain.”

Mae Chwaraeon Cymru, fel rhan o’r Gyngres Chwaraeon, yr Amgylchedd a Hinsawdd (SECC), wedi helpu i ddatblygu hwb ar-lein o adnoddau allweddol i helpu clybiau a sefydliadau chwaraeon i leihau eu heffaith amgylcheddol. Ewch i Hwb Adnoddau SECC yma.