O ymyl y dibyn i ddatblygiad – y clwb tennis sy’n gwasanaethu adfywiad cymunedol

Goleuo'r ffordd gyda chefnogaeth y Loteri Genedlaethol                   

Un broblem fawr a wynebai'r clwb oedd diffyg llifoleuadau. Yn ystod misoedd y gaeaf, nid oedd amser ar y cwrt yn bodoli o gwbl gyda'r nos. I ddod o hyd i ateb, yn 2022 gwnaeth y clwb gais am grant gan Chwaraeon Cymru a dyfarnwyd £35,000 o gyllid y Loteri Genedlaethol iddo drwy Gronfa Cymru Actif Chwaraeon Cymru i oleuo'r clwb yn llythrennol.

Ond dim ond y dechrau oedd y llifoleuadau.

Sesiynau cymdeithasol

Roedd Michaela McDonald yn gymharol newydd i dennis, gan mai dim ond yn ganol oed wnaeth hi gydio mewn raced am y tro cyntaf, ond daeth yn ffigwr annatod yn gyflym i stori Pen-y-Ffordd.

Awgrymodd i bwyllgor y clwb y dylent ddechrau cynnal sesiynau cymdeithasol ar gyfer dechreuwyr a chwaraewyr llai profiadol. Diolch i dafod lleferydd a hysbysebu ar raddfa fechan, roedd yn amlwg bod yr awydd yn lleol am sesiynau tennis cymdeithasol yn uchel.

Cynyddu cyfranogiad merched a genethod

Roedd y clwb eisiau cynyddu nifer y merched a’r genethod oedd yn dod iddo, ac roedd y Prif Hyfforddwr Mike Herd yn teimlo bod arnynt angen hyfforddwr benywaidd i arwain y ffordd. 

Camodd Michaela ymlaen i helpu, gan hyfforddi yn 2023 i ddod yn hyfforddwr cymwys Lefel 2 diolch i grant Loteri Genedlaethol o £1,900, a ddyfarnwyd hefyd gan Chwaraeon Cymru. 

Fe ymunodd y merched i ddechrau ar gyfer chwarae cymdeithasol. Wedi'u hysbrydoli gan Michaela, fe wnaethant ennill hyder yn gyflym, gwneud ffrindiau, a dechrau cystadlu yn erbyn clybiau lleol hyd yn oed.

Hefyd mae Mike a Michaela wedi mynychu cyrsiau dirifedi i ddeall yn well sut i annog mwy o ferched a genethod i gamu ar y cwrt.

O ganlyniad, mae Michaela bellach yn cynnal sesiynau hyfforddi i ferched yn unig, gan ganolbwyntio ar waith tîm a hyder yn hytrach na chystadlu. Ac mae wedi sicrhau rhywfaint o gynnydd mewn cyfranogiad benywaidd gyda merched yn dychwelyd i'r cyrtiau bob wythnos gyda ffrindiau hefo nhw. 

Dywedodd Mike: “Fe gawson ni wybodaeth am ddewisiadau, anghenion a rhwystrau merched i gyfranogiad, sydd wedi ein galluogi ni i deilwra’r sesiynau i fod yn fwy cynhwysol ac yn ddifyrrach. Bydd y ddealltwriaeth yma’n ein helpu ni i barhau i dyfu ein haelodaeth a sicrhau bod tennis yn parhau i fod yn hygyrch ac yn bleserus i bawb yn y gymuned.”

Cael mwy fyth o bobl i chwarae tennis

A dydi Mike a Michaela ddim am stopio yma. Mae eu llygaid ar y dyfodol a sut gallant helpu mwy fyth o bobl i elwa o dennis. Mae Mike eisoes wedi sefydlu sesiwn tennis cerdded ac mae ganddo fwy o gynlluniau ar y gweill.

Mae’r cynlluniau ar gyfer y dyfodol yn cynnwys y canlynol:

• Tennis i bobl anabl.
• Rhaglen bwrpasol o sesiynau tennis ar gyfer pobl sy'n byw gyda chlefyd Parkinson.

Mae'r cyrtiau gwag yn hen hanes a does gan y clwb ddim trafferthion bellach. Mae Clwb Tennis Pen-y-Ffordd wedi cael ei drawsnewid ac wedi dychwelyd yn llwyddiannus yn rhan o'r gymuned.

Cefnogi eich cymuned drwy chwaraeon

Ydych chi'n meddwl am helpu pobl yn eich cymuned i ffynnu drwy chwaraeon? Fel Clwb Tennis Pen-y-Ffordd, gallai Cronfa Cymru Actif helpu eich clwb chi i ddarparu cyfleoedd i bobl o bob gallu.