Mae bowlio lawnt wedi sgubo drwy bentref Llanfairpwll - a'r genhedlaeth iau sy'n arwain y ffordd.
Diolch i gyllid y Loteri Genedlaethol drwy Chwaraeon Cymru, mae Clwb Bowlio Llanfairpwll wedi dod yn ganolfan gymunedol ar gyfer hwyl, mwynhad a chyfeillgarwch.
Er mwyn cyflwyno bowlio lawnt i'r genhedlaeth nesaf, lansiodd y clwb ar Ynys Môn yr 'Academi' - rhaglen wedi’i chreu er mwyn i bobl ifanc allu rhoi cynnig ar y gamp. Ers hynny, mae’r chwaraewyr iau wedi cael eu syfrdanu gan faint o gyffro mae'r gêm yn ei gynnig iddyn nhw.
Cymaint felly fel bod y clwb wedi gwneud cais am gyllid i helpu'r gamp i gyrraedd uchelfannau newydd yn y gymuned leol a rhoi'r profiad gorau posibl i'w aelodau ifanc.
Efallai nad ydi bowlio mor ffasiynol â phêl-droed neu chwaraeon poblogaidd eraill, ond fe fyddwn i’n annog unrhyw berson ifanc i roi cynnig arni. Mae'n llawer o hwyl, fe roddodd gyfle i mi gyfarfod pobl newydd, ac rydw i wedi mynd ymlaen i gynrychioli tîm ieuenctid Cymru.
Yn 2019, derbyniodd Clwb Bowlio Llanfairpwll £1,500 o gyllid y Loteri Genedlaethol drwy Chwaraeon Cymru. Aeth yr arian tuag at ‘bowlio bach ar gyfer dwylo bach’ - offer wedi’i gynllunio i helpu chwaraewyr ifanc i ddysgu’r gêm.
Grant bach oedd hwn, ond mae wedi gwneud byd o wahaniaeth, gan ddarparu’r sylfaen sydd wedi trawsnewid y clwb dros y chwe blynedd diwethaf. Mae wedi dod yn hwb cymunedol lle gall chwaraewyr ifanc ddatblygu eu sgiliau, meithrin cyfeillgarwch a syrthio mewn cariad â bowlio.
Nid yn unig y mae’r chwaraewyr ifanc yn ffynnu yn yr ‘Academi’, ond mae llawer hefyd bellach yn mwynhau chwarae’r gamp mewn gwahanol gynghreiriau ar draws y rhanbarth a thu hwnt.
“Mae cyllid y Loteri Genedlaethol wedi cyfrannu’n aruthrol at lwyddiant yr ‘Academi’ yn Llanfairpwll.
“Y tymor yma fe fyddwn ni’n gwneud mwy fyth o ddefnydd o’r ‘bowlio bach’ ac yn cyflwyno mwy o sesiynau i chwaraewyr ifanc gymryd rhan. Mae’n ymddangos bod bowlio yn y pentref yn cymryd yr awenau gan bêl-droed fel y gamp fwyaf blaenllaw.” - Alun Jones, Cadeirydd Clwb Bowlio Llanfairpwll
“Mae ein cynllun ni ar gyfer y dyfodol yn syml. Parhau â’r gwaith da i greu mwy o lwyddiant a chyflwyno’r gamp i genhedlaeth iau o blant.” - Alun Jones, Cadeirydd Clwb Bowlio Llanfairpwll
Gyda’r Academi yn tyfu a chwaraewyr ifanc yn camu ar y lawntiau, mae dyfodol bowlio ar Ynys Môn yn edrych yn ddisglair.
Oes gennych chi syniad i gael mwy o bobl ifanc i gymryd rhan mewn chwaraeon? Fel Clwb Bowlio Llanfairpwll, fe allai eich clwb chi wneud cais i Gronfa Cymru Actif i wireddu’r syniad.
Gall hyfforddwyr gwrywaidd helpu merched i ffynnu trwy gefnogi iechyd benywaidd.
Mae rygbi Cymru yn sicrhau bod merched a genethod yn cael y gofod maen nhw’n ei haeddu.
O rowlio’n fabi i fflipiau hyderus, mae Priya yn ffynnu yn YMCA y Barri.