Bydd ffigwr blaenllaw yn chwarae rhan fawr wrth siapio dyfodol chwaraeon a gweithgarwch corfforol ar draws Gorllewin Cymru.
Mae Dr Sue Barnes, Prif Swyddog Gweithredol Elusen Ambiwlans Awyr Cymru, wedi cael ei phenodi yn Gadeirydd Partneriaeth Chwaraeon Gorllewin Cymru – sefydliad newydd sbon sydd wedi ymrwymo i wneud cymunedau ar draws y rhanbarth yn iachach ac yn hapusach drwy weithgarwch corfforol.
Mae gennym ni gyfle gwych i weithio gyda chymunedau a sefydliadau ar draws Gorllewin Cymru er mwyn gwella iechyd a lles yn ddramatig drwy fwynhau chwaraeon a bod yn actif.
Dywedodd Dr Barnes: “Mae gennym ni gyfle gwych i weithio gyda chymunedau a sefydliadau ar draws Gorllewin Cymru er mwyn gwella iechyd a lles yn ddramatig drwy fwynhau chwaraeon a bod yn actif. Dyma’r tro cyntaf i sefydliad fel hwn gael ei greu ar gyfer Gorllewin Cymru ac mae’n gyfle y mae angen i ni fanteisio yn llawn arno.
“Mae gan chwaraeon cymunedol gymaint o botensial i wella cymdeithas yn ei chyfanrwydd ac rydw i’n credu’n gryf y gallwn ni gael effaith sylweddol, drwy gydweithio fel rhanbarth.”
Mae Dr Barnes yn ymuno â'r Bartneriaeth gyda chyfoeth o brofiad a ddatblygwyd ar draws nifer o swyddi uchel eu proffil yn y sectorau cyhoeddus, preifat ac elusennol. Mae ganddi ddiddordeb oes yn y rôl y gall ffyrdd o fyw iach ei chwarae mewn iechyd a lles ac mae wedi eiriol yn gadarn dros y buddsoddiad economaidd mewn mesurau ataliol.
Gorllewin Cymru yw'r ail ranbarth yng Nghymru i sefydlu Partneriaeth Chwaraeon yn llwyddiannus. Mae ei chreu a phenodi Dr Barnes yn gerrig milltir arwyddocaol yn yr ymdrech draws-sector i newid y ffordd rydym yn cynllunio ac yn darparu cyfleoedd chwaraeon a gweithgarwch corfforol i gymunedau ledled Cymru.
Eisoes, mae ymdeimlad cadarn o gydweithio ar draws y rhanbarth gyda’r awdurdodau lleol, prifysgolion, clybiau chwaraeon proffesiynol rhanbarthol a’r bwrdd iechyd lleol yn dod at ei gilydd i greu Partneriaeth Chwaraeon Gorllewin Cymru.
Mae Ben Lucas, Cadeirydd Dros Dro y Bartneriaeth yn ystod y cyfnod creu, yn camu i’r ochr nawr ond yn parhau fel Cyfarwyddwr Bwrdd:
“Rydw i wrth fy modd bod Dr Barnes yn cymryd rôl y Cadeirydd, mae hwn yn benodiad rhagorol i’r Bartneriaeth a’r Rhanbarth. Mae’r Bartneriaeth bellach mewn sefyllfa gref ac rydw i’n siŵr, o dan ei harweinyddiaeth hi, y bydd yn sicrhau llwyddiant i Orllewin Cymru,” meddai. “Drwy bwlio ein cryfder ar y cyd a thrwy gyfuno ein hadnoddau a’n harbenigedd, gallwn fod yn wirioneddol uchelgeisiol ar gyfer dyfodol chwaraeon cymunedol.”
Mae Partneriaeth Chwaraeon Gorllewin Cymru yn awyddus i feithrin cysylltiadau â phartneriaid a rhanddeiliaid allweddol.
Oherwydd y diogelwch a'r cyfeillgarwch, menywod yw 75% o'r rhedwyr yn Sole Mate.
Bydd Cronfa Cymru Actif yn cael ei rhedeg gyda thair ‘ffenestr’ ymgeisio yn ystod 2025-26.
Darganfod pam y dylech gynnwys pobl ifanc mewn penderfyniadau diogelu yn eich clwb neu sefydliad chwaraeon.