Y clwb marchogaeth ceffylau sy’n gwneud ei weithgareddau’n fforddiadwy i ferched yng Nghaerffili

Mwy na dim ond marchogaeth: Meithrin cyfeillgarwch a hyder       

Ac i ferched fel Keeley Jones, 17 oed, nid dim ond datblygu sgiliau yn yr arena ceffylau mae’r clwb – mae wedi siapio ei hyder, meithrin cyfeillgarwch am oes, a rhoi llwyfan iddi gyflawni ei breuddwydion gyda’i cheffyl direidus, Nibs.

Fe ymunodd Keeley â’r clwb pan oedd hi’n 11 oed. Ond doedd y dechrau ddim yn un gwych i Nibs. Roedd yn benderfynol ac yn gwrthod neidio yn aml. Ond diolch i gefnogaeth ac amynedd aelodau’r clwb a’r hyfforddwyr, mae Keeley wedi mynd o fod yn ddechreuwr i fod yn gystadleuydd cenedlaethol.

Dywedodd Keeley: “Doeddwn i erioed wedi cystadlu cyn i mi ymuno â Chlwb Marchogaeth Pentref Rhydri a ’fyddwn i byth wedi gallu dod mor bell heb ei gefnogaeth. Mae’r clwb wedi darparu dosbarthiadau gyda’r hyfforddwyr gorau sydd wedi fy nysgu i sut i drin fy ngheffyl, Nibs, yn well. ''

Mae’r gefnogaeth gan y clwb wedi talu ar ei ganfed yn sicr oherwydd mae Keeley a Nibs wedi mynd ymlaen i fod yn bartneriaeth berffaith ers hynny, gan gyrraedd y deg uchaf mewn Cystadleuaeth Genedlaethol yn y DU. Fe wnaethon nhw dalu cost y stabl ar gyfer ei cheffyl yn y gystadleuaeth hyd yn oed.

Creu cyfleoedd ar gyfer mwy o arweinwyr benywaidd yn y dyfodol 

Felly, beth sy'n gwneud y clwb bychan yma mor arbennig? Nid dim ond y marchogaeth - ond y cyfeillgarwch sefydlog, y modelau rôl benywaidd cryf, a'r gred bod pob merch yn haeddu cyfle i ddisgleirio.

Heddiw, mae Keeley yn rhoi rhywbeth yn ôl i'r clwb drwy helpu i feirniadu a threfnu digwyddiadau. Mae'r cyfan yn rhan o genhadaeth Rhydri i annog merched nid dim ond i fod yn farchogion, ond hefyd i fod yn ferched ifanc hyderus ac arweinwyr y dyfodol.

Mae amgylchedd cyfeillgar y clwb yn rhoi cyfle i’r merched fentro y tu hwnt i’r hyn sy’n gyfforddus iddyn nhw gan roi cynnig ar bethau newydd, a ffurfio cysylltiadau sy'n para am oes.

Gweithgareddau marchogol hygyrch a chynhwysol 

Gyda chymysgedd o ddosbarthiadau, clinigau dan arweiniad hyfforddwyr a chystadlaethau lleol bach, mae'r clwb yn awyddus i gadw ei gostau'n isel fel bod fforddiadwyedd ddim yn rhwystr.

Dywedodd Zoe Hewer, aelod o bwyllgor y clwb: “Mae ein camp ni’n ddrud iawn ond dydi Caerffili ddim yn ardal gyfoethog felly rydyn ni’n gwneud ein gorau fel clwb i gadw ein costau ni i lawr.

Mae'r Loteri Genedlaethol a Chwaraeon Cymru wedi ein helpu ni i wneud hynny. Rydyn ni wedi gallu prynu ein hoffer ein hunain felly dydyn ni ddim yn gorfod ei logi bellach. Wedyn rydyn ni’n gallu trosglwyddo'r arbedion costau hynny i'n haelodau ni a rhoi pob cyfle posibl iddyn nhw.”

Oherwydd gyda'r gefnogaeth briodol gan y Loteri Genedlaethol a Chwaraeon Cymru, mae Clwb Marchogaeth Pentref Rhydri yn rhoi cyfle i ferched farchogaeth, perthyn a ffynnu.

Ac fe allwch chithau wneud hynny hefyd! Os oes gennych chi brosiect a fydd yn cael mwy o ferched a genethod i gymryd rhan mewn chwaraeon, fe all Cronfa Cymru Actif eich helpu chi.