Cwpan y Byd i Glybiau Cymru: Creu Gêm Well i Ferched

29/08/2025

Hafan
Newyddion, Straeon a Digwyddiadau
Newyddion, Erthyglau ac Ymgyrchoedd
Cwpan y Byd i Glybiau Cymru: Creu Gêm Well i Ferched

Wrth i ferched Cymru wthio ymlaen yng Nghwpan Rygbi'r Byd, mae clybiau'n camu ymlaen i ddatblygu'r gêm i ferched gartref.

Rydyn ni’n gwybod bod merched a genethod eisiau llefydd diogel a chroesawgar. Ond ar hyn o bryd, dim ond tua hanner y merched yng Nghymru sy'n teimlo bod digon o gyfleusterau chwaraeon yn eu hardal.

Ond mae help wrth law. Gall clybiau wneud cais i Lle i Chwaraeon – Crowdfunder i godi arian a gwella cyfleusterau – gan gynnwys y rhai sydd wedi’u hadeiladu i greu amgylcheddau gwell i ferched.

Mae llawer o glybiau rygbi yng Nghymru wedi gwneud hynny. Dim mwy o flociau cawod budr. Dim mwy o doiledau merched dros dro. Dim mwy o ystafelloedd newid blinedig, annymunol. Drwy gyllid torfol, mae clybiau'n rhoi'r llefydd maen nhw'n eu haeddu i'n merched a'n genethod ni…

Toiledau merched newydd yng Nghlwb Rygbi Treorci

Pan sefydlodd Clwb Rygbi Treorci ei dîm merched ddwy flynedd yn ôl, roedd y diddordeb yn enfawr. Roedd y chwaraewyr yn awyddus ac fe dyfodd y niferoedd yn gyflym.

Ond roedd un broblem fawr. Roedd angen dybryd am adnewyddu toiledau'r merched.

Ac felly fe drodd Clwb Rygbi Treorci at Lle i Chwaraeon – Crowdfunder. Fe gododd y clwb £6,000 drwy’r ymgyrch, gan gynnwys £3,600 gan Chwaraeon Cymru.

Mae’r clwb mor gefnogol i dîm y merched ac yn deall bod angen i ni nid yn unig wella’r toiledau, ond bod angen i ni ei wneud yn amgylchedd mwy croesawgar. Fe ofynnodd y pwyllgor i ni beth roedden ni ei eisiau a sut dylai edrych. Mae pethau syml fel ychwanegu biniau deunyddiau mislif hyd yn oed yn cael effaith fawr. Rydyn ni’n teimlo bod y clwb wir yn gwneud ymdrech i ddangos ein bod ni’n perthyn.

Prif Hyfforddwr, Isla Lewis:

Clwb Rygbi Birchgrove yn anelu at godi arian ar gyfer ystafell newid a thoiledau newydd

Mae clwb yn Abertawe, Clwb Rygbi Birchgrove, yn gobeithio croesi’r llinell gyda’i ymgyrch cyllid torfol barhaus. Gyda tharged o £15,000, ei nod yw creu ystafell newid a thoiledau i ferched a genethod.

Mae'n ymfalchïo mewn adran iau lewyrchus ac yn darparu ar gyfer merched hyd at 11 oed, cyn iddyn nhw symud ymlaen i Hwb Merched Eagles Abertawe.

Ac mae'r clwb - sy'n awyddus i groesawu mwy o ferched - yn gwybod nad yw ei doiledau a'i ystafelloedd newid yn ddigon da.

Mae'n bwysig i ni ein bod ni mor gyfeillgar â phosibl i ferched. Rydyn ni eisiau i ferched ddechrau eu siwrnai rygbi gyda ni felly mae angen iddyn nhw deimlo'n gartrefol. Mae'n hanfodol bod ein cyfleusterau ni'n addas ac yn groesawgar.

Carl Thompson

Nid dim ond chwaraewyr Birchgrove fydd y cyfleusterau newydd yn eu cefnogi. Byddant hefyd yn caniatáu i'r clwb gynnal gemau rhanbarthol i ferched a genethod, gan helpu mwy fyth o chwaraewyr i gymryd rhan.

Hyd yma, mae'r clwb wedi codi ychydig o dan £6,000. Gyda mwy o gefnogaeth, gall Clwb Rygbi Birchgrove gyrraedd ei darged a darparu’r cyfleusterau y mae merched a genethod yn eu haeddu.

Beth yw Lle i Chwaraeon?

Mae Lle i Chwaraeon yn gronfa gan Chwaraeon Cymru. Mae'n helpu clybiau chwaraeon i godi arian drwy Crowdfunder i wella eu cyfleusterau.

Os bydd eich clwb chi’n dechrau tudalen codi arian ar Crowdfunder, gallai Chwaraeon Cymru gefnogi hyd at 60% o'ch targed hyd at uchafswm o £15,000.

Gwnewch gais nawr.

Merched a Genethod yn y Byd Chwaraeon yng Nghymru - #HiActifCymru

Dyma’r haf mwyaf erioed i chwaraeon merched yng Nghymru. Gwelwch beth sy’n digwydd yr haf yma, am straeon ysbrydoledig a sut gall eich clwb neu eich sefydliad chi chwarae ei ran. Gwelwch beth sy’n digwydd yr haf yma, am straeon ysbrydoledig a sut gall…

Darllen Mwy