Sut bydd £3.3m yn cael ei wario ar welliannau i gyfleusterau chwaraeon

Pam mae'r cyllid yn bwysig?

Dywedodd Prif Swyddog Gweithredol Chwaraeon Cymru, Brian Davies, fod y buddsoddiad yn cefnogi'r Weledigaeth ar gyfer Chwaraeon yng Nghymru:

“Am y drydedd flwyddyn yn olynol, rydyn ni’n arbennig o falch o fod wedi gallu dyfarnu swm mawr o gyllid i helpu i ddiogelu dyfodol hirdymor nifer o ganolfannau hamdden drwy eu gwneud yn fwy effeithlon o ran ynni ac yn gynaliadwy. Bydd y prosiectau yma hefyd yn sicrhau arbedion carbon sylweddol, gan helpu i gefnogi targedau newid hinsawdd Cymru.”

Dywedodd y Gweinidog Chwaraeon, Jack Sargeant:

"Mae'r buddsoddiad hwn o £3.3 miliwn yn cynrychioli ein hymrwymiad ni i greu Cymru actif lle mae chwaraeon a gweithgarwch corfforol yn hygyrch i bawb, o gyfranogwyr ar lawr gwlad i'n hathletwyr mwyaf talentog.

"Drwy flaenoriaethu prosiectau sy'n gwneud chwaraeon yn fwy cynhwysol, yn cefnogi datblygiad athletaidd ac yn gwella effeithlonrwydd ynni, nid yn unig rydyn ni'n gwella cyfleusterau ym mhob cwr o Gymru ond hefyd rydyn ni'n cyfrannu at ein targedau newid hinsawdd drwy welliannau cynaliadwy."

Mae'r holl grantiau wedi bod yn bosibl diolch i gyfanswm o £10 miliwn o gyllid cyfalaf ar gyfer 2025-26 sydd wedi'i neilltuo i Chwaraeon Cymru gan Lywodraeth Cymru. Cyhoeddir y manylion yn fuan ynghylch sut bydd y £6.7 miliwn sy'n weddill yn cael ei fuddsoddi.

Sut dewiswyd y prosiectau?

Gwnaeth awdurdodau lleol, cyrff rheoli chwaraeon a phartneriaid cenedlaethol gais am gyfran o'r 'cyllid cyfalaf' yma. Rhoddodd Chwaraeon Cymru flaenoriaeth i'r ceisiadau oedd yn cyflawni'r canlynol:

• Gwneud chwaraeon yn fwy cynhwysol i bawb
• Cefnogi datblygiad athletwyr talentog
• Gwella effeithlonrwydd ynni a chynaliadwyedd

"Drwy flaenoriaethu prosiectau sy'n gwneud chwaraeon yn fwy cynhwysol, yn cefnogi datblygiad athletaidd ac yn gwella effeithlonrwydd ynni, nid yn unig rydyn ni'n gwella cyfleusterau ym mhob cwr o Gymru ond hefyd rydyn ni'n cyfrannu at ein targedau newid hinsawdd drwy welliannau cynaliadwy."

Mae'r holl grantiau wedi bod yn bosibl diolch i gyfanswm o £10 miliwn o gyllid cyfalaf ar gyfer 2025-26 sydd wedi'i neilltuo i Chwaraeon Cymru gan Lywodraeth Cymru. Cyhoeddir y manylion yn fuan ynghylch sut bydd y £6.7 miliwn sy'n weddill yn cael ei fuddsoddi.

Pa fath o brosiectau sydd wedi derbyn cyllid?

Gellir gweld rhestr lawn o'r 37 o brosiectau a fydd yn derbyn cyllid cyfalaf isod:

Dadansoddiad o gyllid yn ôl ardal leol

Pen-y-bont ar Ogwr

• Bydd dau gwrt pêl rwyd macadam yng Nghanolfan Chwaraeon Bracla, sydd wedi'i lleoli yng nghefn Ysgol Uwchradd Gatholig yr Archesgob McGrath ym Mhen-y-bont ar Ogwr, yn cael eu huwchraddio i un cwrt CTA 2G / synthetig, ynghyd â llifoleuadau LED, diolch i grant o £65,316. ​​Bydd y cyfleuster newydd yn darparu ar gyfer chwaraeon amrywiol.

Caerdydd

• Mae Athletau Cymru wedi derbyn £29,439 tuag at ddatblygu ardal hyfforddi gwaywffon yn Stadiwm Chwaraeon Rhyngwladol Caerdydd yn Lecwydd.

Ceredigion

• Bydd gwelliannau gwresogi, goleuadau ac inswleiddiad yn cael eu gwneud yng Nghanolfan Hamdden Caron yn Nhregaron diolch i gyllid gwerth £83,700.

Conwy

• Mae dyfarniad o £250,000 wedi cael ei wneud i gefnogi datblygiad datgarboneiddio enfawr gwerth £8 miliwn mewn tair canolfan hamdden: Canolfan Hamdden Abergele, Canolfan Hamdden Colwyn a Phwll Nofio Llanrwst.
• Bydd amryw o welliannau sy'n gysylltiedig â chriced yn cael eu cwblhau yng Nghanolfan Hamdden Y Morfa ym Mae Cinmel, sy'n ganolfan griced i Ogledd Cymru. Bydd £118,377 yn cael ei wario ar wiced artiffisial awyr agored, adnewyddu caeau, ynghyd â mesurau effeithlon o ran ynni ar gyfer y ganolfan ei hun.

Sir y Fflint

• Ym Mhwll Cei Connah, bydd £82,220 yn cael ei ddefnyddio ar gyfer ailgrowtio'r pwll, gorchuddion pwll sy'n effeithlon o ran ynni a theclynnau codi.

Gwynedd

• Dyfarnwyd £100,000 i Gyngor Gwynedd tuag at uwchraddio offer ffitrwydd yn Byw’n Iach Dwyfor ym Mhwllheli.

Merthyr Tudful

• Dyfarniad o £40,000 i gefnogi prosiect Cyngor Bwrdeistref Sirol Merthyr Tudful i uwchraddio’r cae astroturf ar safle caeau Aberfan Grove i gae 3G i roi sylw i brinder y sir o arwynebau artiffisial. Mae cynlluniau i’r 3G gynnwys pad sioc newydd i alluogi defnydd rygbi.

Casnewydd

• Dyfarnwyd grant o £146,546 i Gymnasteg Cymru i drawsnewid hen adeilad ym Mhill yn gyfleuster gymnasteg a chodi hwyl mewn gemau.
• Gwnaed dyfarniad o £30,610 i Gyngor Casnewydd i gefnogi ei nod o uwchraddio’r cae chwaraeon artiffisial presennol yng Nghanolfan Mileniwm Pill i gae 3G.
• Bydd £12,500 yn mynd tuag at osod paneli solar ym mhencadlys canolog Golff Cymru yng Ngwesty’r Celtic Manor i gefnogi nodau cynaliadwyedd y sefydliad.

Sir Benfro

• Bydd £275,000 yn mynd tuag at bympiau ac unedau hidlo yng nghanolfannau hamdden Dinbych-y-pysgod ac Aberdaugleddau i sicrhau bod y ddau gyfleuster yn gynaliadwy yn y tymor hir drwy leihau'r defnydd o ynni.

Powys

• Bydd y canolfannau hamdden yn Aberhonddu, Ystradgynlais a Dwyrain Maesyfed yn dod yn fwy effeithlon o ran ynni yn dilyn dyfarnu £56,433 tuag at bympiau pwll a chyfnewidwyr gwres, tra bydd £113,850 yn mynd tuag at unedau trin aer yng nghanolfannau hamdden Bro Ddyfi a Flash.

Rhondda Cynon Taf

• ​​Bydd £20,068 yn cael ei ddefnyddio i uwchraddio'r byrddau deifio yng Nghanolfan Hamdden Sobell yn Aberdâr.

Abertawe

• I gefnogi'r diddordeb cynyddol mewn padel, bydd Tennis Cymru yn defnyddio £288,000 tuag at drosi cwrt awyr agored yn dri chwrt padel dan do, gyda llifoleuadau LED, yng Nghanolfan Tennis Abertawe. Mae hyn yn rhan o ddatblygiad mwy sy'n cynnwys ailwynebu pedwar cwrt dan do ac uwchraddio tri chwrt awyr agored arall i glai.
• Mae Cyngor Abertawe a Freedom Leisure wedi derbyn dau grant i helpu eu cyfleusterau hamdden i ddod yn fwy cynaliadwy yn amgylcheddol. Bydd £141,743 yn mynd tuag at uwchraddio pwll nofio ac ailosod boeleri yng Nghanolfan Hamdden Treforys ynghyd ag uned trin aer yng Nghanolfan Hamdden Penyrheol. Yn y cyfamser, bydd £60,544 yn cael ei ddefnyddio i osod ffaniau dadhaenu a fydd yn lleihau'r defnydd o ynni yn y canolfannau hamdden yng Nghefn Hengoed, Penlan, Penyrheol a Threforys.
• Bydd Parc Chwaraeon Bae Abertawe yn elwa o uwchraddio llifoleuadau LED ar gyfer y ddau gae hoci a'r trac athletau diolch i ddyfarniad o £173,682. Bydd y trac athletau’n cael ei ailwynebu hefyd gan fod Athletau Cymru wedi gwneud cais llwyddiannus am gyllid gwerth £175,000.

Torfaen

• Er mwyn helpu i ddiwallu'r galw am bêl fasged yn Nhorfaen, bydd dyfarniad o £20,489 yn talu am gylchoedd pêl fasged hyblyg o ran uchder a byrddau sgorio electronig yng Nghanolfan Hamdden Cwmbrân a Chanolfan Byw’n Actif Pont-y-pŵl.
• Mae Cyngor Torfaen wedi derbyn £36,315 hefyd a fydd yn cael ei roi tuag at arwyneb newydd yn y cyfleuster bowlio dan do yn Stadiwm Cwmbrân.

Bro Morgannwg

• Mae £70,000 wedi cael ei ddyfarnu i Gyngor Bro Morgannwg i gefnogi cynlluniau ar gyfer parc sglefrio awyr agored yn Bear Field yn y Bont-faen.
• Bydd dyfarniad o £12,403 yn cyllido rhwydi criced a chylchoedd pêl fasged yng Nghanolfan Hamdden Llanilltud Fawr i wella'r ddarpariaeth ar gyfer clybiau lleol sy'n defnyddio'r ganolfan ar gyfer sesiynau hyfforddi.
• Bydd neuadd chwaraeon Canolfan Hamdden Penarth yn cael ei huwchraddio gyda llawr newydd diolch i grant o £51,000.

Wrecsam

• Bydd dyfarniad o £66,519 yn mynd tuag at uwchraddio'r unedau trin aer yn Waterworld yn Wrecsam.
• Yn dilyn dyfarniad o £54,000 a wnaed y llynedd ar gyfer bylbiau LED yn Stadiwm Queensway yn Wrecsam, cytunwyd ar gyllid gwerth £74,106 ar gyfer colofnau llifoleuadau newydd ar drac athletau'r cyfleuster a chaeau 3G bach.
• Bydd yr uwchraddio ar y system wresogi a chylchrediad y pwll yn cael ei wneud yng Nghanolfan Hamdden Gwyn Evans a Chanolfan Hamdden y Waun diolch i grant o £99,765.

Cymru Gyfan

Dyfarnwyd rhywfaint o gyllid i Gyrff Rheoli Cenedlaethol i dalu am offer chwaraeon a fydd yn cael ei ddefnyddio ledled y wlad:

• Bydd Triathlon Cymru yn derbyn £27,450 tuag at brynu sglodion amseru a meddalwedd i wella hygyrchedd a fforddiadwyedd digwyddiadau aml-chwaraeon ledled Cymru.
• Wrth i athletau symud oddi wrth ddefnyddio gynnau i ddechrau rasys, mae Athletau Cymru wedi derbyn £4,482 i brynu system ddechrau electronig y gellir ei defnyddio mewn digwyddiadau ledled y wlad.
• Bydd RYA Cymru yn derbyn £64,615 i brynu dau gwch ffoilio, dau gwch diogelwch a dau drelar. Mae pedwar deg y cant o'r holl ddisgyblaethau hwylio Olympaidd yn ddosbarth ffoil bellach, sy'n arbennig o addas i hwylwyr benywaidd.

Chwaraeon perfformiad

Mae sawl prosiect chwaraeon perfformiad wedi derbyn cyllid hefyd i helpu i gefnogi athletwyr mwyaf talentog Cymru i gyflawni eu potensial:

• Mae Undeb Rygbi Cymru wedi derbyn £260,800 tuag at ystafell adfer boeth / oer newydd i gymryd lle eu siambr cryo bresennol a chynorthwyo adferiad corfforol a gwydnwch meddyliol ymhellach.
• Hefyd mae Undeb Rygbi Cymru wedi derbyn £207,200 tuag at adnewyddu'r gampfa llwybr yn y Ganolfan Ragoriaeth Genedlaethol yn Hensol, Bro Morgannwg.
• Mae Bocsio Cymru wedi derbyn £43,200 tuag at brynu gwarchodwyr gwm sy'n cofrestru grym G i astudio dwysedd a grym yr ergydion y mae bocswyr ifanc yn eu cymryd yn ystod hyfforddiant a gornestau. Mae gan Focsio Cymru gynlluniau i weithio gyda'r adrannau niwroleg perthnasol ym Mhrifysgolion Caerdydd ac Abertawe i archwilio'r effaith y mae ergydion yn eu cael ar ddatblygiad ymennydd pobl ifanc, fel eu bod yn gallu llunio canllawiau a gefnogir gan dystiolaeth feddygol.
• Mae Nofio Cymru wedi derbyn dau grant i ddarparu amgylcheddau o safon byd i'w hathletwyr. Mae offer campfa a ffisiotherapi newydd yn dod i’r Pwll Cenedlaethol yn Abertawe diolch i grant o £9,837, a bydd £6,934 yn mynd tuag at brynu offer dadansoddi fideo mwy modern ac offer nofio perfformiad uchel.
• Ac yn olaf ond nid y lleiaf, mae Beicio Cymru wedi gwneud cais llwyddiannus am £45,548 a fydd yn cael ei ddefnyddio i uwchraddio cyfleuster Canolfan BMX Genedlaethol Cymru yn Llanrhymni, Caerdydd.