Dywed seren Gymnasteg Cymru, Brinn Bevan, nad yw’n all aros i gael y ddraig ar ei frest wrth iddo geisio anrhydeddu ochr ei ddiweddar dad o’r teulu a chynrychioli Cymru yng Ngemau’r Gymanwlad y flwyddyn nesaf.
Mae Bevan wedi cystadlu yng Ngemau Olympaidd 2016 ac mae hefyd wedi ennill medal ym Mhencampwriaethau'r Byd ac Ewrop - gan ennill arian ac efydd, yn y drefn honno.
Ond nid yw wedi cystadlu yng Ngemau’r Gymanwlad eto ac mae'n gobeithio cystadlu yn ei Gemau cyntaf yn Birmingham y flwyddyn nesaf.
“Gemau’r Gymanwlad yw’r un olaf i’w thicio oddi ar y rhestr i mi,” eglura Bevan, sy’n hanu o Essex ond yn cynrychioli Cymru drwy ochr ei dad o’r teulu.
“Roedd newid i Gymru yn benderfyniad rydw i wedi bod eisiau ei wneud ers amser hir iawn. Rydw i wedi bod yn ceisio ers pan oeddwn i'n 10 oed i wneud y newid yma.
“Fe fydd yn arbennig iawn gan fy mod i'n teimlo y byddaf yn cystadlu dros fy nhreftadaeth gartref. Rydw i eisiau gwneud fy nhad a'i ochr e o'r teulu yn falch.
“Ers cyn cof, rydyn ni bob amser wedi ceisio ymweld ag Aberystwyth bob blwyddyn i weld y teulu.
“Hyd yn oed pan rydw i gartref, rydw i bob amser yn cefnogi Cymru mewn chwaraeon eraill, fel rygbi. Mae'n deimlad gwych gallu cynrychioli Cymru.
“Dydw i ddim yn gallu aros i gael y ddraig ar fy mrest.”
Mae Bevan, 24 oed, sy'n hanu o Southend, yn gefnogwr angerddol i gymnasteg Cymru ac mae'n gobeithio helpu'r gamp i ddatblygu ymhellach yng Nghymru.
“Nid yw gymnasteg ymhlith y campau mwyaf yng Nghymru ar hyn o bryd ond rydw i’n credu ei bod yn rhywbeth a all dyfu,” meddai.
“Os gallaf i ysbrydoli’r genhedlaeth iau - wel gwych. Mae cael athletwyr mwy a gwell yn siŵr o helpu.”
“Yn arwain at Gemau’r Gymanwlad, rydw i’n credu bod gennym ni siawns wych o ennill medal tîm.
“Mae llawer o unigolion cryf ac rydw i’n credu y byddwn ni’n dod at ein gilydd yn dda fel tîm, a fydd, gobeithio, yn ysbrydoli pobl i ddechrau cymryd rhan mewn gymnasteg.
Os yw caledi meddyliol wedi bod yn hanfodol i bob athletwr yn ystod 18 mis diwethaf y pandemig, roedd gan Bevan ddigon ohono.
Bu’n rhaid iddo fod yn gryf yn ystod y flwyddyn ddiwethaf ar ôl i’w obeithion o gyrraedd Tokyo gael eu chwalu yn y digwyddiad prawf olaf oherwydd torri asgwrn yn ei goes dde yn ystod ymarfer.
Nid dyma’r tro cyntaf i asgwrn wedi torri amharu ar ei gynnydd.
“Fe gefais i anaf anffodus yn y treial Olympaidd diwethaf gan dorri fy nghoes, unwaith eto, ond rydw i bellach wedi cael dod yn ôl ac rydw i’n falch o fod yn ôl yn cymryd rhan,” meddai’r gymnast a wnaeth hefyd orfod goresgyn torri ei goes yn y cyfnod cyn Gemau Olympaidd Rio yn 2016.
“Roedd yn anodd iawn, ond mae llawer o bobl wedi bod mewn sefyllfa anodd hefyd, gyda’r coronafeirws ac fel mae hynny wedi tarfu ar hyfforddiant.
“Yn y trydydd treial, roeddwn i wir yn teimlo fy mod i’n ôl yn fi fy hun. Roeddwn i'n teimlo fel cystadleuydd a gymnast eto.
“Wrth lamu gefais i fy anaf ac yn rhwystredig iawn, hwnnw oedd fy narn olaf.
“Roeddwn i’n meddwl bod popeth wedi mynd yn dda tan hynny. Ond yn syth, fe drodd fy ffocws i ar adfer, wnaeth fy helpu i’n feddyliol. ”
