Tri pheth y gall eich clwb criced eu cyllido drwy Lle i Chwaraeon

Clwb Criced Gwersyllt yn dod yn hwb cymunedol

Gyda help llaw gan Crowdfunder a Chwaraeon Cymru, mae Clwb Criced Gwersyllt Wrecsam yn tyfu’r gêm yn y gymuned.

Mae eisoes wedi denu cyllid sylweddol o Gronfa Ffyniant Bro Llywodraeth y DU, ond mae’r clwb wedi codi £15,000 pellach drwy Crowdfunder a Chronfa Lle i Chwaraeon gan Chwaraeon Cymru.

Bydd yr arian yn cael ei ddefnyddio i ailwampio ei bafiliwn, gan ei wneud yn fwy hygyrch a chynhwysol fel bod mwy o aelodau'r gymuned yn gallu mwynhau criced. Gyda sgwad criced anabl, tîm criced merched ac adran criced iau ffyniannus, mae'r clwb yn cymryd camau enfawr i ddod yn glwb cynhwysol.

Bydd yr arian yn cael ei fuddsoddi mewn ramp mynediad anabledd, gan wneud yr ystafelloedd newid yn fwy hygyrch a bydd yn helpu i greu hwb cymunedol fel bod y clwb criced wrth galon bywyd y gymuned leol.

Allai eich clwb chi fod wrth galon eich cymuned gyda rhai gwelliannau i’w gyfleusterau? Edrychwch i weld allech chi wneud cais.

Clwb Criced Casnewydd yn cadw ei diroedd mewn cyflwr ardderchog

Mae Clwb Criced Casnewydd yn glwb cymunedol amrywiol, ffyniannus, gydag 17 o dimau gwahanol, ac mae’n cael ei redeg yn gyfan gwbl gan wirfoddolwyr.

Ond wrth i unrhyw glwb ehangu a darparu mwy o gyfleoedd nag erioed o’r blaen, mae’r gofynion ar y tir yn gallu bod yn enfawr – ac nid oedd peiriannau’r clwb yn ddigon da. I ddechrau, fe wnaeth ei roler trwm dibynadwy, oedd wedi cael ei atgyweirio dro ar ôl tro, roi’r gorau i weithio yn y diwedd. Mae rholer yn ddarn hanfodol o’r cit mewn clwb criced gan fod ei angen i baratoi'r wiced a'r sgwâr.

Penderfynodd y clwb roi cynnig ar Crowdfunder a’r cynllun Lle i Chwaraeon gan Chwaraeon Cymru a chododd fwy na £15,000 ar gyfer y rholer newydd. Roedd yr ymgyrch codi arian mor llwyddiannus fel bod y clwb wedi rhoi cynnig arni eto y flwyddyn ganlynol. Y tro yma, ar gyfer peiriant torri gwair newydd. Roedd y gwirfoddolwyr yn treulio tua 12 awr yn torri'r gwair ond fe welodd y byddai peiriant torri gwair newydd, cyflymach yn haneru'r amser sydd ei angen - sy'n golygu mwy o amser i griced! Cododd £17,000 arall.

Ydi eich peiriannau a'ch offer chi wedi dyddio? Allai offer newydd wella eich cyfleuster chi? Allai fod yn fwy amgylcheddol gyfeillgar? Mwy o wybodaeth am gynllun Lle i Chwaraeon gan Chwaraeon Cymru.

Edrychwch ar ein canllaw cam wrth gam i wneud cais i Lle i Chwaraeon x Crowdfunder.