WRTH I’R LOTERI GENEDLAETHOL DROI YN 27, MAE CHWARAEON CYMRU YN GOFYN I GYMUNEDAU GREU NEWID

Dyma Brian Davies, Prif Swyddog Gweithredol Chwaraeon Cymru, i esbonio:

“Mae edrych yn ôl ar yr hyn a gyflawnwyd yn y byd chwaraeon yng Nghymru o ganlyniad i’r loteri yn anhygoel. Chwaraewyr y Loteri Genedlaethol sy’n gyfrifol am hynny ac rydyn ni mor ddiolchgar. Mae mwyafrif y grantiau ar gyfer £10,000 neu lai sy'n golygu bod y Loteri Genedlaethol yn helpu prosiectau bach i wneud gwahaniaeth mawr yn eu cymunedau.

Ac mae'r Loteri Genedlaethol yn parhau i gael effaith enfawr ar chwaraeon yng Nghymru drwy Gronfa Cymru Actif:

“Hyd yma mae Cronfa Cymru Actif, sy’n cael ei chyllido gan y Loteri Genedlaethol a Llywodraeth Cymru, wedi dyfarnu mwy na £5.2m, gan helpu mwy na 1300 o glybiau i godi’n ôl ar eu traed ar ôl i’r pandemig daro gyntaf,” ychwanegodd Brian. “Mae Cronfa Cymru Actif yn parhau ar agor ac rydyn ni’n annog cymunedau ledled Cymru i feddwl am yr hyn y gallant ei wneud i wella a sut gallant gyrraedd cyfranogwyr newydd.”

Nod Cronfa Cymru Actif - sy'n cynnig grantiau o hyd at £50,000 - yw helpu i gael mwy o bobl yn fwy actif. Gall clybiau a phrosiectau chwaraeon ddefnyddio'r cyllid i uwchsgilio gwirfoddolwyr, prynu offer newydd, gwella cyfleusterau neu ariannu technoleg arloesol i gyrraedd mwy o bobl.

Mae Clwb Rygbi Pentyrch ar fin mynd yn wyrdd ar ôl cael grant o £8000 i osod paneli solar ar do'r clwb. Mae'n bwriadu defnyddio'r arbedion ynni i fuddsoddi mewn grwpiau rygbi cerdded ar gyfer dynion a merched. Yn y cyfamser, mae Aren Cymru wedi derbyn cyllid a fydd yn cael ei fuddsoddi mewn sesiynau hyfforddi pêl droed ar gyfer cleifion trawsblaniadau yn ogystal â'r rhai ar ddialysis.

Roedd ymgyrch #ifyougoigo Datblygiad Chwaraeon Torfaen yn llwyddiannus gyda’i chais am gyllid hefyd. Mae'n cynnig rhaglen gweithgarwch corfforol 10 wythnos i ferched sy'n cynnwys sesiynau grŵp wythnosol, hyfforddiant personol un i un, mentora a chyngor maeth. Mae un cyfranogwr hyd yn oed wedi nodi nad oes arni angen meddyginiaeth bellach ar gyfer gorbryder ac iselder. 

“Rydyn ni’n angerddol am helpu’r rhai sydd ei angen fwyaf,” meddai Brian. “Rydyn ni’n croesawu prosiectau sy’n ceisio mynd i’r afael ag anghydraddoldeb mewn cyfranogiad chwaraeon ymhlith merched a genethod, cymunedau ethnig amrywiol, a phobl sy’n byw mewn ardaloedd o amddifadedd.”