Cyfwelodd Savanta 1,012 o ymatebwyr 16+ oed ar-lein rhwng 25ain Ebrill a 29ain Ebrill 2025. Mae Savanta yn aelod o Gyngor Pleidleisio Prydain ac yn cadw at ei reolau. Roedd yr holl gyfranogwyr o Gymru ac mae'r data wedi cael eu pwysoli i fod yn gynrychioliadol o'r boblogaeth yng Nghymru yn ôl oedran, rhywedd, rhanbarth a statws economaidd-gymdeithasol.
Arolwg Traciwr Gweithgareddau Cymru 16 - Ebrill 2025
Y canfyddiadau
Mae canfyddiadau diweddaraf Traciwr Gweithgarwch Cymru yn parhau i ddatgelu tueddiadau calonogol mewn ymddygiadau ac agweddau cyfredol tuag at weithgarwch corfforol yng Ngwanwyn 2025.
- Mae’r lefelau gweithgarwch corfforol yn sefydlog ar hyn o bryd o gymharu â'r don flaenorol a mis Ebrill 2024, gan fod bron i hanner (49%) yr oedolion yng Nghymru yn cymryd rhan ar hyn o bryd mewn gweithgarwch corfforol ar 2 i 4 diwrnod yr wythnos.
- Er hynny, ers mis Ebrill 2024, mae cynnydd wedi bod yn nifer cymedrig y dyddiau y mae oedolion yng Nghymru yn cymryd rhan mewn gweithgarwch corfforol o 2.94 ym mis Ebrill 2024, i 3.22 ym mis Ebrill 2025. Mae hyn yn golygu bod oedolion yng Nghymru, ar gyfartaledd, yn gwneud mwy o ddyddiau o weithgarwch corfforol eleni o gymharu â'r llynedd.
Y tu hwnt i lefelau gweithgarwch corfforol, mae arferion neu fwriadau gwirfoddoli ar y lefel uchaf ers i’r tracio ddechrau.
- Er hynny, mae’n werth adlewyrchu mai dim ond 18% yw’r lefel uchaf erioed, gyda 36% o oedolion yng Nghymru yn dweud eu bod nhw’n debygol o wirfoddoli i gefnogi chwaraeon a gweithgarwch corfforol yn ystod y 12 mis nesaf. Mae deall beth allai annog mwy o oedolion i gymryd rhan fel gwirfoddolwyr yn bwysig o hyd wrth gynnal a thyfu’r ddau ffigur yma.
Roedd chwaraeon merched a’r effaith mae wedi’i chael ar eu gweithgarwch chwaraeon yn gwestiwn pwnc a gyflwynwyd yn y don yma o’r traciwr.
- Mae tua thraean yn dweud eu bod wedi gwylio digwyddiad chwaraeon neu weithgarwch corfforol merched yn ystod y tri mis diwethaf yn eithaf arwyddocaol, ac mae’r ffaith ei fod wedi ysbrydoli chwarter o’r rheini i gynyddu eu lefelau gweithgarwch yn benodol yn gadarnhaol ac yn dangos yr effaith y gall twf chwaraeon merched ei chael.
- Mae’n arbennig o ddiddorol bod hanner yr ymatebwyr wedi mynychu digwyddiad merched yn ddigymell ac mae hwn yn adlewyrchiad diddorol i bawb sy’n gweithio yn y byd chwaraeon – beth sy’n ei wneud mor hawdd cerdded i gêm merched?
- Yn amlwg, fodd bynnag, mae llawer sy’n bwriadu mynychu chwaraeon merched a bydd hynny’n ddefnyddiol i’w wybod ar gyfer datblygiad yn y dyfodol yn y maes hwn – mae’n debygol y bydd llawer o gefnogwyr yn dychwelyd.
Tynnwyd sylw at effaith cyfryngau cymdeithasol wrth gymell oedolion yng Nghymru i fod yn actif yn y don yma o'r traciwr.
- Mae 31% o oedolion yng Nghymru wedi gweld tuedd, her neu ddylanwadwr gweithgarwch corfforol yn ystod y 3 mis diwethaf, gyda 66% o'r bobl hynny'n dweud ei fod wedi dylanwadu'n gadarnhaol ar eu penderfyniad i gymryd rhan mewn chwaraeon neu weithgarwch corfforol.
- Mae'r canfyddiad hwn yn dangos pwysigrwydd cyfryngau cymdeithasol i ddylanwadu'n gadarnhaol ar oedolion yng Nghymru i fod yn gorfforol actif, ac o ganlyniad dylai fod yn bwysig i'r sector ehangach ffrwyno’r defnydd o gyfryngau cymdeithasol er mwyn parhau i gyfrannu at y lefelau gweithgarwch uchel a ddangosir ledled Cymru ar hyn o bryd.
Yn olaf, mae'n werth nodi bod costau byw yn effeithio ar allu pobl i deimlo y gallant fod yn actif.
- Sut gall cynigion chwaraeon a gweithgarwch corfforol ddiwallu anghenion pobl sydd wedi gwneud y dewis anodd i roi'r gorau i ambell aelodaeth neu weithgaredd oherwydd nad yw eu cyllideb yn ymestyn mor bell mwyach?
