Bydd Cronfa Cymru Actif Chwaraeon Cymru yn ailagor ar gyfer ceisiadau newydd o 9am ymlaen ar ddydd Llun 4 Tachwedd.
Gan ddefnyddio arian y Loteri Genedlaethol, mae Cronfa Cymru Actif yn cynnig grantiau rhwng £300 a £50,000 sy’n galluogi clybiau a sefydliadau chwaraeon i brynu offer, gwella eu cyfleusterau a chefnogi datblygiad gwirfoddolwyr a hyfforddwyr fel eu bod yn gallu cefnogi mwy o bobl i fod yn actif.
Mae Chwaraeon Cymru wedi derbyn llu o geisiadau am gyllid eleni, felly cafodd Cronfa Cymru Actif ei gohirio dros dro i geisiadau newydd ganol mis Medi er mwyn gallu prosesu’r ceisiadau oedd eisoes yn y system.
Mae Cronfa Cymru Actif yn ailagor nawr gyda gwerth £1m o gyllid yn weddill.
Bydd y gronfa ar agor am 10 wythnos o ddydd Llun 4 Tachwedd ymlaen, a bydd angen cwblhau pob cais yn llawn erbyn 10am ar ddydd Llun 13 Ionawr. Bydd y gronfa wedyn yn cael saib eto er mwyn gallu prosesu’r ceisiadau cyn diwedd y flwyddyn ariannol.
Os ydych chi wedi bod yn llwyddiannus yn eich cais am grant gan Gronfa Cymru Actif ers 1 Ebrill 2024, nid ydych yn gymwys i wneud cais eto tan 1 Ebrill 2025 ac mae eich grant llwyddiannus wedi ei gau.
Gyda swm cyfyngedig o arian yn weddill, mae Chwaraeon Cymru eisiau pwysleisio’r canlynol:
Y cam cyntaf i unrhyw glwb neu grŵp cymunedol sydd â diddordeb mewn cyllid yw llenwi'r ffurflen mynegi diddordeb ar gyfer buddsoddiad cymunedol. Os bydd eich syniad yn gymwys ar gyfer Cronfa Cymru Actif, bydd Tîm Buddsoddiadau Chwaraeon Cymru yn cysylltu â chi.
Wrth asesu ceisiadau cymwys, effaith gymunedol prosiect fydd y pwynt allweddol fydd yn cael ei ystyried.
Dywedodd Owen Hathway, Cyfarwyddwr Cynorthwyol ar gyfer Dirnadaeth, Polisi a Materion Cyhoeddus yn Chwaraeon Cymru: “Mae nifer y ceisiadau sydd wedi’u gwneud i Gronfa Cymru Actif eleni wedi bod y mwyaf rydyn ni wedi’u derbyn erioed. Rydyn ni’n edrych ymlaen at weld sut mae clybiau a sefydliadau cymunedol yn bwriadu defnyddio’r cyllid sy’n weddill i roi hwb pellach i chwaraeon yng Nghymru, a byddwn yn cefnogi cymaint ohonyn nhw â phosibl.
“Fodd bynnag, dim ond £1m sydd gennym ni’n weddill, felly mae posibilrwydd na fydd rhai ymgeiswyr cymwys yn cael eu cefnogi yn ystod y flwyddyn ariannol yma. Fe fyddan nhw, wrth gwrs, yn gallu ailymgeisio pan fydd y gronfa’n ailagor ar gyfer y flwyddyn ariannol newydd ym mis Ebrill 2025.”
Sylwch y bydd y Gronfa ‘Lle i Chwaraeon’ y mae Chwaraeon Cymru yn ei gweithredu ar y cyd â Crowdfunder yn parhau ar agor ac yn hygyrch drwy gydol y cyfnod hwn. Mae ‘Lle i Chwaraeon’ yn helpu i ddarparu cyllid ar gyfer cyfleusterau oddi ar y cae fel gwelliannau i ystafelloedd newid a gwell mynediad i bobl anabl ac ati.
Mae Tîm Buddsoddiadau Chwaraeon Cymru yn parhau i fod wrth law i helpu unrhyw un sydd eisiau arweiniad a chyngor. Gallwch anfon e-bost at y tîm ar [javascript protected email address] neu eu ffonio ar 0300 3003102, o ddydd Llun i ddydd Gwener, rhwng 10:00 a 12:30 a 13:15 a 16:00.
