Mae Warren Gatland wedi cyhoeddi carfan swyddogol Cymru ar gyfer Cwpan Rygbi'r Byd 2023 eleni yn Ffrainc.
O'r 33 chwaraewr fydd yn croesi'r Sianel i gynrychioli Cymru ar y llwyfan mwyaf, byddai nifer wedi cael rhai o'u profiadau rygbi cyntaf mewn clybiau cymunedol ledled Cymru.
Mae'r clybiau hyn yn parhau i gynnig cyfleoedd i chwarae rygbi yn eu cymuned gyda rhywfaint o gefnogaeth gan gyllid Chwaraeon Cymru. Pwy a ŵyr, efallai y bydd seren nesaf Cwpan Rygbi'r Byd Cymru yn chwarae rygbi yn un o'r clybiau hyn heddiw.
Dyma rai o glybiau cymunedol aelodau carfan Cwpan Rygbi'r Byd Cymru sydd wedi cael cefnogaeth y Loteri Genedlaethol drwy Gronfa Cymru Actif.
Sam Costelow a Tommy Reffell – Clwb Rygbi Pencoed
Mae'r clwb wedi cyflwyno Gavin Henson, Gareth Thomas a Gareth Cooper i ni. Y newydd-ddyfodiaid diweddaraf yw Sam Costelow a Tommy Reffell, a fydd yn cael eu blas cyntaf ar Gwpan Rygbi'r Byd yn Ffrainc 2023.
Dyfarnodd Chwaraeon Cymru £9,840 i Glwb Rygbi Pencoed drwy Gronfa Cymru Actif ym mis Mehefin 2023. Gwnaeth y clwb o Ben-y-bont ar Ogwr gais am lifoleuadau symudol fel y gallent arbed costau llogi lleoliadau ar gyfer hyfforddiant yn ystod nosweithiau tywyll y gaeaf. Gyda nifer o dimau dynion, menywod, ieuenctid ac iau y clwb i ddarparu ar eu cyfer, bydd y llifoleuadau symudol yn cael eu defnyddio'n effeithiol ac yn helpu i wneud y clwb yn fwy cynaliadwy yn ariannol ar gyfer y dyfodol.
Gallai seren ryngwladol Cymru yn y dyfodol fod yn paratoi'i ffordd ei hun i Gwpan Rygbi'r Byd o dan y llifoleuadau hynny.
George North – Clwb Rygbi Llangefni
Mae rhanbarth Gogledd Cymru yn cael ei gynrychioli yng ngharfan Cwpan Rygbi'r Byd gan yr 8fed sgoriwr cais uchaf mewn rygbi rhyngwladol dynion - George North. Clwb Rygbi Llangefni oedd lle cododd bêl rygbi yn Ynys Môn am y tro cyntaf cyn iddo symud i Goleg Llanymddyfri gydag Academi'r Scarlets.
Cafodd y clwb £2,933 o arian y Loteri Genedlaethol drwy Gronfa Cymru Actif ym mis Medi'r llynedd. Gyda'r buddsoddiad mawr ei angen hwn, fe brynon nhw offer newydd sbon ar gyfer eu 11 tîm iau fel bod plant yn Ynys Môn yn cael y profiad rygbi gorau.
Gan obeithio cynyddu'r cyfleoedd rygbi i siaradwyr Cymraeg iaith gyntaf yng Ngogledd Cymru, maent hefyd wedi sicrhau cyllid i uwchsgilio eu gwirfoddolwyr Cymraeg ar gyrsiau hyfforddi.
