Mae Josh Stacey yn gwybod y byddai ei daid wedi bod yn falch ohono - nid yn unig am ei fedal aur yn y Gymanwlad, ond am y siwrnai naw mlynedd a gymerodd iddo gyrraedd yno.
Enillodd Stacey fedal aur yng nghystadleuaeth senglau’r dynion yn nosbarthiadau para 8-10 yn yr NEC yn Birmingham, gan arwain y ffordd ar gyfer gorffeniad gorau erioed Cymru mewn tennis bwrdd yng Ngemau’r Gymanwlad.
Trechodd Josh Lin Ma o Awstralia yn y rownd derfynol, mewn categori ar gyfer chwaraewyr â nam corfforol cymedrol i ysgafn.
Roedd yr athletwr a aned yng Nghaerdydd wrth ei fodd yn ennill yr aur ar ôl hawlio efydd yn ei Gemau cyntaf ar Arfordir Aur Awstralia yn 2018.
Mae wedi bod yn siwrnai hir a throellog i’r chwaraewr 22 oed, a ddechreuodd gymryd rhan yn y gamp yn 13 oed. Roedd ei emosiwn wrth ennill ar y diwedd yn glir i bawb ei weld.
Wrth lapio ei hun ym maner Cymru ar y cwrt ar y diwedd, gan edrych ar ei ffrindiau a'i deulu yn y standiau, dywedodd Josh: "Fe fu farw fy nhaid ym mis Ebrill. Roedd hyn iddo fe!
“Mae'n rhywbeth rydych chi'n breuddwydio amdano. Rydw i mor ddiolchgar am yr holl gefnogaeth rydw i wedi’i chael, mae wedi bod yn anhygoel.”
Ar hap, fe wnaeth sesiwn blasu a gynhaliwyd yn ei ysgol helpu Josh i syrthio mewn cariad â thennis bwrdd. Hwn oedd y drws agored wnaeth ei alluogi i fynd ymlaen i fod yn un o chwaraewyr gorau’r byd.
“Fe ddaeth fy hyfforddwr tymor hir, Simon Oyler, i fy ysgol uwchradd i gynnal sesiynau tennis bwrdd,” meddai Josh.
“Dim ond sesiwn blasu oedd yn cael ei gynnig a doeddwn i ddim yn dda iawn, os ydw i’n onest, ond fe wnaeth fy natur gystadleuol i mi fod eisiau mynd yn ôl a cheisio gwella.
“O fewn ychydig wythnosau, roeddwn i wedi gwirioni’n llwyr a wnes i erioed edrych yn ôl ar ôl hynny.
“Fe wnes i chwarae rygbi, pêl droed a rhedeg trac. Roeddwn i'n mwynhau chwaraeon yn gyffredinol, ond doeddwn i ddim wedi dod o hyd i gamp roeddwn i wrth fy modd â hi ac yn awyddus iawn i'w ddilyn."
