Heb gyllid gan y Loteri Genedlaethol, ni fyddai llawer o’r gefnogaeth sy’n cael ei rhoi i athletwyr elitaidd yng Nghymru yn bosibl. Byddai cyfansoddiad Tîm Prydain Fawr yn edrych yn wahanol iawn heb yr holl docynnau Lotto a Thunderball sydd wedi cael eu prynu dros y flwyddyn ddiwethaf.
Mae arian y Loteri Genedlaethol wedi bod yn newid mawr i chwaraeon yng Nghymru ers bron i 30 mlynedd.
Ers i’r peli arian mawr ddechrau cael eu rholio yn 1994, mae’r Loteri Genedlaethol wedi cyllido athletwyr elitaidd Cymru yn uniongyrchol, wedi cefnogi’r clybiau ar lawr gwlad maen nhw’n dod i’r amlwg drwyddyn nhw, a hefyd wedi buddsoddi mewn creu cyfleusterau chwaraeon o safon byd.
Mae mwy na 1,000 o athletwyr elitaidd ar Raglen Safon Byd UK Sport sy’n cael ei chyllido gan y Loteri Genedlaethol, sy’n galluogi iddyn nhw hyfforddi’n llawn amser, cael mynediad at hyfforddwyr gorau’r byd ac elwa o gymorth meddygol arloesol.
Mae gwasanaethau cefnogi hanfodol – gan gynnwys y rhai sy’n cael eu darparu yn Athrofa Chwaraeon Cymru – mewn meysydd fel maeth, cyngor perfformiad, cynlluniau hyfforddi a ffisiotherapi, i gyd yn cael eu pweru gan arian y Loteri Genedlaethol. Mae'r holl ddisgyblaethau yma’n hollbwysig er mwyn cael athletwyr Cymru i berfformio ar eu gorau ar lefelau uchaf chwaraeon rhyngwladol.
Ers 1994, mae clybiau a phrosiectau chwaraeon ledled Cymru wedi derbyn £377m diolch i chwaraewyr y Loteri Genedlaethol. Dyfarnwyd £6,177,013 o’r cyfanswm hwnnw gan Chwaraeon Cymru drwy Gronfa Cymru Actif rhwng mis Ebrill 2023 a mis Mawrth 2024.
Hefyd mae arian y Loteri wedi helpu i dalu am gyfleusterau fel Stadiwm Principality, Pwll Cenedlaethol Cymru a Felodrom Cenedlaethol Geraint Thomas. Mae’r lleoliadau chwaraeon eiconig yma’n gwthio athletwyr elitaidd Cymru i berfformio ar eu gorau.
Mae Prif Weithredwr Chwaraeon Cymru, Brian Davies, yn credu bod arian y Loteri Genedlaethol wedi bod yn hanfodol ar bob lefel o chwaraeon yng Nghymru: “Mae arian y loteri yn newid bywydau – ar lefel gymunedol ac elitaidd, a dyna’n union y cafodd ei gynllunio i’w wneud. Nid dim ond gwneud enillwyr y loteri yn filiwnyddion oedd y bwriad. Mae’r loteri wedi bod yn chwaraewr arwyddocaol i holl chwaraeon Cymru.”
Diolch i holl chwaraewyr y Loteri Genedlaethol – rydych chi’n rhan bwysig o’r tîm!