Cyllid ar gyfer llogi lleoliad
Mae pob un ohonom ni angen llefydd i chwarae, does? Ac rydyn ni'n gwybod y gall y gost o logi lleoliad fod yn ddrud iawn. Dyna pam rydyn ni’n gwneud yn siŵr bod clybiau sy’n dechrau o’r newydd yn gallu gwneud cais i Gronfa Cymru Actif i helpu i dalu cost archebu lleoliad am ddeg wythnos.
A dyna’n union wnaeth Hoci’r Waun pan gafodd ei sefydlu fel clwb am y tro cyntaf ac adeiladu ei sesiynau ar gyfer plant iau, pobl ag anableddau a phobl hŷn hefyd.
Felly os ydych chi'n glwb newydd neu'n sefydlu tîm newydd, ewch amdani! Gwnewch gais heddiw!
Cyllid ar gyfer offer
Rydyn ni’n deall y gall cit fod yn ddrud a dyna pam rydyn ni wedi’i gwneud yn genhadaeth i helpu clybiau a grwpiau ledled Cymru. Boed yn gonau, ffyn hoci neu goliau, mae Cronfa Cymru Actif wrth law i helpu i dalu am offer.
Fe roddwyd £3,703 i Glwb Hoci Llaneurgain i brynu offer gwarchodol, offer hyfforddi a hyd yn oed cynhwysydd storio i'w cadw nhw ynddo. Mae'r grant wedi helpu'r clwb i annog mwy o bobl i gydio mewn ffyn a mynd ar y cae drwy wneud y gamp yn fwy fforddiadwy. Ac ar ben hynny, mae hoci yn Llaneurgain yn cael ei gyflwyno yn y Gymraeg ac yn Saesneg! Da iawn bawb!
Rydyn ni hefyd wrth ein bodd yn eich helpu chi i gyllido offer fel bod clybiau’n gallu cynnig sesiynau cynhwysol. Fe wnaeth Hoci’r Waun gais hefyd am brynu ffyn hoci ysgafnach a pheli i gynnal sesiynau hoci cerdded - ac wrth gwrs fe wnaethon ni ddweud iawn!
Cyllid ar gyfer cyrsiau hyfforddi
Hyfforddwyr, swyddogion a swyddogion cymorth cyntaf yw asgwrn cefn unrhyw glwb hoci – ac mae cyrsiau hyfforddi a datblygu hyfforddwyr yn hynod bwysig. Drwy hyfforddi pobl ychwanegol fe allwch chi gynnal sesiynau ychwanegol, timau ychwanegol a gemau ychwanegol.
Dyna pam mae Cronfa Cymru Actif yn croesawu ceisiadau ar gyfer datblygu hyfforddwyr, cyrsiau dyfarnu a hyfforddiant cymorth cyntaf. Mae'n helpu clybiau i dyfu a denu cyfranogwyr newydd.
Fe ddyfarnwyd cyllid i Glwb Hoci Merched Llanfair i uwchsgilio ei wirfoddolwyr. Gan dderbyn grant o £3,103, fe wnaethon nhw brynu offer a chitiau cymorth cyntaf hefyd.
A chofiwch, fe allwch chi wneud cais am logi lleoliad, offer a datblygu hyfforddwyr i gyd yn yr un cais.
Oeddech chi'n gwybod?
Gall clybiau a grwpiau ledled Cymru sicrhau cyllid cyfatebol gan Chwaraeon Cymru hefyd ar gyfer gwelliannau i gyfleusterau oddi ar y cae fel ystafelloedd newid neu fynediad i bobl anabl, neu hyd yn oed offer arbenigol fel Camerâu Veo. Mwy o wybodaeth am Crowdfunder.
Chwiliwch amdanom ni ar Twitter yma a Facebook yma.
