Wrth i ni ddathlu'r haf mwyaf erioed i chwaraeon merched yng Nghymru, mae mwy o ferched a genethod nag erioed o'r blaen yn cymryd rhan, yn arwain ac yn rheoli chwaraeon.
Ond ni ddigwyddodd hyn dros nos. Ac er ein bod ni’n cydnabod bod mwy i'w wneud o hyd i sicrhau bod merched a genethod yn cael cae chwarae teg, rydyn ni wedi dod yn bell diolch i flynyddoedd o waith caled ac ymrwymiad gan sefydliadau, hyfforddwyr a gwirfoddolwyr.
Felly beth am i ni edrych ar rai ffyrdd y mae chwaraeon yng Nghymru yn creu amgylcheddau chwaraeon gwell i ferched a genethod.
Adeiladu cyfleusterau chwaraeon ar gyfer merched
Rydyn ni’n gwybod bod merched a genethod eisiau lleoliadau addas, wedi'u cynnal a'u cadw'n dda, fel ystafelloedd newid a thoiledau, sydd wedi'u hadeiladu ar eu cyfer nhw.
Mae ychydig dros hanner y merched yng Nghymru yn teimlo bod nifer digonol o gyfleusterau chwaraeon yn eu hardal leol.
Ond mae prosiectau fel Cronfa Gwaddol Golff Cymru yn gweithio i fynd i'r afael â'r sefyllfa i wneud yn siŵr bod y llefydd yn ddigon da. Wrth i Gymru baratoi ar gyfer Pencampwriaeth Agored y Merched AIG, bydd mwy na 70 o brosiectau’n trawsnewid y gêm i ferched a genethod a byddant yn cynnwys gwelliannau i doiledau ac ystafelloedd newid cyrsiau golff – gan sicrhau bod y gamp ar y cwrs cywir i ddenu mwy o ferched yn y dyfodol.
Ydych chi wedi meddwl am wneud cais i Lle i Chwaraeon - Crowdfunder i uwchraddio eich cyfleusterau chi?
