Cefnogi amrywiaeth ar fyrddau
Rydyn ni’n credu ei bod yn bwysig bod pobl sy’n gwneud penderfyniadau yn dod o wahanol gefndiroedd gyda gwahanol brofiadau, gan adlewyrchu’r cymunedau rydyn ni’n eu gwasanaethu. Rydyn ni wedi ymrwymo i helpu sector chwaraeon Cymru i gyflawni amrywiaeth ar eu byrddau.
Pam dylai ein byrddau fod yn amrywiol?
Rydyn ni’n ceisio creu sector chwaraeon amrywiol a chynhwysol yng Nghymru sy’n darparu cyfleoedd cyfartal mewn chwaraeon. Rydyn ni eisiau gweld amrywiaeth yn ein seilwaith ac rydyn ni’n angerddol am fynd i’r afael ag anghydraddoldeb.
Ceir tystiolaeth glir i awgrymu bod sefydliadau amrywiol yn gallu ymateb i amrywiaeth ehangach o ffactorau, ac yn gallu rhoi rhagor o ystyriaeth i ofynion rhanddeiliaid ac, yn y pen draw, gwneud penderfyniadau gwell.
Mae sefydliadau amrywiol yn llesol i fusnes – ym mhob sector, nid dim ond ar gyfer chwaraeon.
Byrddau gyda chydbwysedd rhwng y rhywiau
Yn 2018, cytunodd Bwrdd Chwaraeon Cymru ar amcan polisi ar gyfer pob Corff Llywodraethu Chwaraeon Cenedlaethol a Phartner Cenedlaethol, sef sicrhau cydraddoldeb rhwng y rhywiau ar eu Byrddau.
Yn ôl diffiniad Comisiwn yr UE, cydraddoldeb rhwng y rhywiau yw o leiaf 40% o ferched neu ddynion.
Rydyn ni’n cydnabod nad rhywedd yw’r unig nodwedd amrywiol sydd angen ei hystyried ond mae’n faes lle mae’n rhaid i ni fel sector gyflymu’r cynnydd.
