Wedyn, trawsnewidiodd ei fusnes i ganolbwyntio mwy ar atgyweirio a gwerthu beiciau, rhywbeth yr oedd hefyd wedi'i wneud wrth redeg y caffi.
Y dyddiau hyn, prif ffocws Gruff yw cystadlu, felly siop apwyntiad yn unig yw’r siop feiciau, ond fel mae’n pwysleisio, “mae’r peiriant coffi yn ei le o hyd ac mae bob amser ymlaen i rywun sydd eisiau paned.
“Mae beicio yn gamp gymdeithasol. Rydyn ni’n hoffi dod at ein gilydd ac mae bob amser yn syniad gwych i drefnu teithiau grŵp, sy’n aml yn golygu y gallwch chi hefyd eistedd i lawr gyda ffrindiau wedyn a siarad am unrhyw beth a phopeth dros baned.”
Mae manteision cymdeithasol beicio wedi golygu bod beicio grŵp wedi ffynnu ymhlith clybiau ledled Cymru, ond nid dim ond dynion canol oed mewn lycra sy’n dyheu am rywle i eistedd, yfed coffi a gollwng stêm gyda’u ffrindiau.
Mae hwn yn bwynt y mae Tom Overton yn awyddus i’w bwysleisio, wrth iddo baratoi i agor The Bike Lock, caffi newydd a lleoliad storio beiciau sydd ar fin lansio yng Nghaerdydd.
Nid lycra, beiciau rasio drud a barfau hipster yw popeth. Mae’n ymwneud ag annog a chefnogi unrhyw un sydd eisiau mynd ar gefn beic yn amlach, i gyrraedd y gwaith, i siopa, neu i gwrdd â ffrindiau am sgwrs.
“Mae syniad bod beicwyr i gyd yn ddynion canol oed mewn lycra, ond rydw i eisiau denu pawb ar gefn beic,” meddai Tom, beiciwr brwd sydd â chenhadaeth i ehangu mynediad i feicio fel gweithgaredd i bawb.
“Rydw i eisiau normaleiddio beicio, fel yn Ewrop, fel y ffordd y mae rhywun yn symud o gwmpas y lle. Rydw i eisiau i hynny fod yn brofiad hwylus i bobl Cymru.”
Mae The Bike Lock yn fenter gymdeithasol a fydd yn cynnig storfa ddiogel ar gyfer hyd at 50 o feiciau, mannau gwefru beiciau trydan, cawodydd, gofod gwaith, a choffi o’r radd flaenaf wedi’i rostio’n lleol.
“Pan rydych chi ar gefn beic, mae gennych chi amser ar gyfer sgyrsiau anffurfiol gyda phobl eraill. Ond mae stopio am goffi a chael dal i fyny yn rhan o hynny,” meddai Tom.
“Yn ystod Covid, roedd yn rhyddhad oherwydd roedd pethau’n anodd i bawb ac rydw i’n meddwl bod y teimlad hwnnw o elwa o drafod pethau gyda ffrindiau wedi parhau.
“Fy mreuddwyd i yw y bydd The Bike Lock yn cynnig teimlad o dafarn leol, ond bod pobl yn gallu cadw’n iach drwy ddefnyddio beic, gweld ffrindiau a chael sgwrs ar ddiwedd y dydd. Nid dim ond mater o ddod i mewn a chael coffi yw hyn, ac wedyn rhuthro i ffwrdd.”
Ond nid dim ond beicwyr fydd yn lapswchan eu lattes, yn estyn am eu espressos ac yn mwynhau eu mocha cortados ar y Diwrnod Coffi Rhyngwladol.
Mae aelodau Clwb Triathlon Porthcawl yn cyfarfod yn rheolaidd yn Grow and Grind, siop goffi ar Draeth Coney ym Mhorthcawl, lle perffaith i gael sgwrs ar ôl rhedeg, beicio neu nofio.
Mae’r clwb yn rhoi pwyslais mawr ar iechyd meddwl ac mae ganddo gysylltiadau â grwpiau cymorth lleol fel Breaking Free, Andy’s Man Club a Mental Health Matters Wales.
Felly – bobl sy’n hoffi coffi a beicwyr brwd – tynnwch y llwch oddi ar eich beic, mentrwch ar y llwybrau beicio a gwnewch ffrindiau drwy bŵer paned ar y Diwrnod Coffi Rhyngwladol.
