Strategaeth Chwaraeon Cymru

Beth rydyn ni eisiau ei gyflawni

Yn ein strategaeth, rydyn ni wedi amlinellu chwe lefel o fwriad strategol a fydd yn dylanwadu ar y ffordd mae’r sefydliad yn gweithio yn y dyfodol:

1. BOD YN BERSON-GANOLOG: Anghenion a chymhelliant yr unigolyn yn arwain y ddarpariaeth, boed yn dechrau arni, yn anelu am gynnydd neu’n ceisio rhagoriaeth ar lwyfan y byd.

2. RHOI DECHRAU GWYCH I BOB PERSON IFANC: Pob person ifanc â sgiliau, hyder a chymhelliant i alluogi iddyn nhw fwynhau a gwneud cynnydd drwy chwaraeon; gan roi iddyn nhw sylfeini i fyw bywyd actif, iach a chyfoethog.

3. SICRHAU BOD PAWB YN CAEL CYFLE I FOD YN ACTIF DRWY CHWARAEON: Chwaraeon yn gynhwysol ac yn darparu profiad gwych i bawb

4. DOD Â PHOBL AT EI GILYDD AR GYFER Y TYMOR HIR: Sector chwaraeon cydweithredol, cynaliadwy a llwyddiannus sy’n cael ei arwain gan wybodaeth a dysgu ar y cyd.

5. DANGOS MANTEISION CHWARAEON: Gwelir tystiolaeth o effaith chwaraeon ac mae cyrhaeddiad chwaraeon yn cael ei deall yn llawn, ei werthfawrogi, ei arddangos a’i ddathlu ledled Cymru.

6. BOD YN SEFYDLIAD O WERTH MAWR: Chwaraeon Cymru yn sefydliad uchel ei barch sy’n ceisio gorgyflawni drwy ddarparu gwasanaeth o’r radd flaenaf drwy ein staff gwerthfawr.

Sut rydyn ni’n newid

• Mae ein dull ni o weithredu yn newid. Rydyn ni eisiau parhau i ddysgu, deall ac archwilio.
• Byddwn yn ceisio bod yn fwy hyblyg fel ein bod yn gallu ymateb yn gynt i anghenion a chymhelliant pobl Cymru a’u cymunedau fel maent yn newid.
• Byddwn yn buddsoddi yn ein hadnoddau yn wahanol, gan chwilio am gyfleoedd newydd i gydweithredu ac annog cydweithredu effeithiol, sydd â photensial i greu effaith bellgyrhaeddol a dyfnach.
• Byddwn yn parhau i weithio gyda’n partneriaid presennol ond rydyn ni’n agored i weithio gyda gwahanol fathau o sefydliadau hefyd.
• Byddwn yn casglu tystiolaeth er mwyn dal ati i wella’r hyn rydyn ni’n ei wneud.

Rydyn ni’n esblygu a byddem wrth ein bodd pe baech chi’n ymuno â ni ar y siwrnai tuag at Gymru hapusach ac iachach gyda gwell ffocws ar chwaraeon.

Cysylltu

Os oes gennych chi unrhyw adborth neu os hoffech gael rhagor o wybodaeth, cysylltwch â communications@sport.wales