Parkwood Leisure, un o weithredwyr cyfleusterau hamdden mwyaf blaenllaw y DU, fydd darparwr rheolaeth newydd Plas Menai, Canolfan Awyr Agored Genedlaethol Cymru, o 01 Chwefror 2023 ymlaen.
Bydd y contract newydd yn golygu y bydd Parkwood Leisure yn rhedeg y Ganolfan o ddydd i ddydd am gyfnod cychwynnol o ddeng mlynedd. Bydd yr adeiladau a’r tir yn parhau i fod yn eiddo i Chwaraeon Cymru a bydd yr holl staff presennol yn parhau i gael eu cyflogi ar y safle.
Fel rhan o’r cytundeb newydd, mae grŵp partneriaeth strategol sy’n cynnwys cynrychiolwyr o Chwaraeon Cymru, Parkwood Leisure, a staff Plas Menai, wedi’i sefydlu i ganolbwyntio ar ddatblygu a gwella’r gwasanaethau presennol, a chefnogi’r staff gyda’r pontio.
Wrth siarad am lofnodi’r contract, dywedodd Graham Williams, Cyfarwyddwr yn Chwaraeon Cymru: “Rydw i’n falch iawn o groesawu Parkwood Leisure yn ffurfiol fel y partner sydd wedi’i gomisiynu i reoli’r Ganolfan Awyr Agored Genedlaethol ym Mhlas Menai.
“Mae Parkwood yn deall yn glir pa mor bwysig yw Plas Menai i Chwaraeon Cymru, y sector a’r gymuned leol ac mae eu hanes o gydweithio i wella a darparu gwasanaethau yng Nghymru a thu hwnt yn nodedig.
“Mae Plas Menai eisoes yn ddarparwr byd-enwog ar weithgareddau awyr agored gyda staff balch ac angerddol a does gen i ddim amheuaeth y bydd yr arbenigedd ychwanegol fydd yn cael ei gyfrannu gan Parkwood Leisure yn arwain at fwy o bobl yn mwynhau popeth sydd gan Blas Menai i’w gynnig. Rydw i’n gyffrous i weld yr hyn y gallwn ni ei gyflawni gyda’n gilydd.”
Gyda mwy na 25 mlynedd o brofiad mewn datblygu a gweithredu cyfleusterau hamdden, mae Parkwood Leisure yn rhedeg mwy na 75 o safleoedd mewn mwy na 30 o awdurdodau lleol ledled Cymru a Lloegr, gan gynnwys canolfan gweithgareddau awyr agored Dolygaer, sydd ym Mannau Brycheiniog.
Dywedodd Glen Hall, Rheolwr Gyfarwyddwr Parkwood Leisure: “Rydyn ni’n falch iawn o fod yn ymgymryd â gweithredu Plas Menai, gan weithio gyda Chwaraeon Cymru i sicrhau dyfodol cynaliadwy i’r safle yn y tymor hir.
“Mae annog ffyrdd o fyw hapusach ac iachach wrth wraidd yr hyn rydyn ni’n ei wneud yn Parkwood, ac rydyn ni’n ymroddedig i gynnal y lefelau uchel o wasanaeth y mae Plas Menai yn adnabyddus amdano a darparu mwy o gyfleoedd i bobl fwynhau’r cyfleuster gwych.”
Am fwy o wybodaeth neu i drefnu ymweliad â Phlas Menai, ewch i https://www.plasmenai.wales/.