Mae Cymdeithas Bêl Droed Cymru wedi cydnabod manteision iechyd a chymdeithasol merched ifanc ledled Cymru yn hoff o bêl droed hefyd.
Am ormod o ddegawdau roedd y gêm yn un i ddynion, ond bellach mae hybiau hyfforddi ar draws ysgolion a chlybiau yn agor drysau i ferched fwynhau gweithgarwch corfforol rheolaidd.
Un rhaglen ddiweddar fu ymgyrch Be.Football CBDC.
Mae’n bartneriaeth gyda’r Youth Sport Trust sy’n ceisio gwella’r profiad o Addysg Gorfforol i ferched mewn ysgolion drwy ddefnyddio pêl droed mewn ffyrdd mwy perthnasol.
Gallai hynny olygu cysylltu sgiliau ar y cae â sgiliau bywyd, neu fagu hyder drwy weithgarwch corfforol, gyda phêl droed unwaith eto yn gyfrwng.
Mae hefyd yn ceisio gwella sgiliau arwain ymhlith merched fel eu bod hwy, yn eu tro, yn gallu helpu i wella lefelau gweithgarwch corfforol. Ystyrir bod modelau rôl a mentoriaid yn hanfodol i lwyddiant y rhaglen.
Doedd dim digon o fodelau rôl pan oedd James yn yr ysgol yn Sir Benfro ond mae chwaraewraig Tottenham yn dweud bod help llaw a chefnogaeth yn hanfodol er mwyn galluogi iddi ddilyn ei huchelgais.
“Un peth rydw i wedi ceisio meddwl amdano’n ddiweddar ydi’r bobl sydd wedi fy helpu i gyrraedd y pwynt yma,” meddai.
“Roedd fy athrawon i yn Ysgol y Preseli mor bwysig ar fy siwrnai i. Fy hyfforddwyr i o oedran iau a’r chwaraewyr o'r adeg y des i i'r gwersyll am y tro cyntaf.
“Rydw i’n hoffi gwneud yn siŵr nad ydw i’n anghofio’r holl help rydw i wedi’i gael ac rydw i’n edrych ymlaen yn fawr at y gemau yma, bydd cael y torfeydd mwyaf erioed yn Stadiwm Dinas Caerdydd yn anhygoel. Bydd y gefnogaeth yn help mawr i'n gwthio ni dros y llinell.
“Mae fy mhennaeth i yn Ysgol y Preseli, Mike Davies, yn gefnogwr pêl droed mawr ac mae’n gwneud llawer o bethau i Sgorio, y rhaglen deledu.
“Pan oeddwn i yn yr ysgol roedd yn rhaid i mi gymryd llawer o amser i ffwrdd oherwydd pêl droed. Roedd rhaid i mi deithio i Abertawe a Chaerdydd, mae'r cyfleoedd i lawr yn y gorllewin yn llawer gwell nawr na beth oedden nhw.
“Chefais i erioed unrhyw drafferth, fe fyddai’n fy annog i gymryd diwrnod ychwanegol yma ac acw, roedd mor gymwynasgar ac mor gefnogol. Fe anfonodd neges destun ata’ i yr wythnos yma, felly roedd hynny'n grêt. Roedd yn braf clywed ganddo.”
Hefyd mae CBDC wedi addo gwneud yn siŵr bod y cynnydd diweddar ym mhoblogrwydd pêl droed ymhlith merched yn gynaliadwy drwy wella mynediad i’r gêm ar lawr gwlad.
Ymhlith addewidion diweddar y corff rheoli roedd ymrwymiad i gael 20,000 o ferched i chwarae pêl droed yng Nghymru erbyn 2024.
Mae hynny’n golygu sicrhau bod gan bob merch ifanc glwb lleol ynghyd â hyfforddwyr cymwys. Y targed sydd wedi’i nodi yw bod 600 o hyfforddwyr benywaidd newydd yn eu lle erbyn 2024.
Mae unrhyw un sy'n dymuno dilyn hyfforddiant yn cael ei annog i ddilyn y cymhwyster Tystysgrif C Gêm y Merched sydd newydd gael ei ddatblygu ac sydd wedi'i anelu at ferched a dynion sydd eisiau hyfforddi ym maes pêl droed merched.
Ar lefel clwb domestig, mae’r ailstrwythuro diweddar ar gêm y merched yn dechrau gwreiddio ac roedd dangosydd o’r twf posib yn amlwg ym mhenwythnos agoriadol Uwch Gynghrair Adran Genero.
Daeth record cynghrair o 1,426 o gefnogwyr i wylio'r pencampwyr Dinas Abertawe yn ennill yn erbyn Met Caerdydd yn Stadiwm Swansea.com.
“Pan oeddwn i’n tyfu i fyny, dim ond y dynion oeddwn i’n eu gweld yn chwarae, felly doeddwn i ddim yn sylweddoli y gallwn i wneud hynny hefyd. Ond rydych chi'n gweld y gêm yn tyfu, yr Ewros, Cwpanau'r Byd, mae’n enfawr.
Doedd y niferoedd hynny, y strwythur clybiau, a’r rhaglenni hyfforddi ac ysgolion sy’n sail iddynt ddim ar gael i James 20 mlynedd yn ôl.
Mae'n cyfaddef ei bod wedi gorfod gadael Cymru i ddod yn nes at wireddu ei breuddwydion.
“Mae’n bwysig dilyn eich breuddwyd ac roedd bob amser yn freuddwyd i mi chwarae pêl droed yn broffesiynol.
“Fe wnes i fentro ymhellach a symud i Lundain yn 15 oed. Doeddwn i ddim yn gwybod sut i goginio, sut i lanhau, roedd mam yn gwneud popeth i mi. Roedd jyst pacio a symud, roedd yn anodd iawn.
“Rydw i’n cofio ffonio fy nhad a gofyn iddo fe ddod i fy nôl i am fy mod i eisiau dod adref. Fe ddywedodd e jyst dal ati am rai wythnosau i weld sut mae'n mynd, a wnes i byth edrych yn ôl.
“Yn anffodus, roedd yn golygu bod rhaid i mi adael Cymru, ond fe wnes i ddilyn fy mreuddwyd ac rydw i wedi bod yn ei fyw ers hynny.”
