Y gyrrwr rasio 16 oed sydd â’i droed yn drwm ar y sbardun

"Rydw i’n falch iawn o gael fy nghefnogi gan Chwaraeon Cymru,”

Roedd ail hanner y tymor yn well fyth, gyda thair buddugoliaeth arall mewn rasys a gorffen ar y podiwm 10 gwaith, gan sicrhau’r teitl F4 i Matthew ar ddiwedd y 29ain a'r rownd olaf ond un yn Brands Hatch.

“Roeddwn i’n falch iawn o ennill teitl Pencampwriaeth F4 Prydain ar fy ymgais gyntaf, oherwydd ei bod yn gyfres mor gystadleuol,” meddai Matthew.

“Nid dim ond safon y gyrwyr sy’n bwysig, ond mae pedwar neu bump o’r timau gorau’n rhedeg dau neu dri gyrrwr da iawn ac mae pob un ohonyn nhw'n abl i ennill y teitl. 

“Dyma un o’r pencampwriaethau sengl anoddaf i’w hennill, yn enwedig yn eich blwyddyn gyntaf.”

Mae Matthew hefyd yn falch iawn o'i dreftadaeth Gymreig.

Mae'n cario baner Cymru ar ei siwt rasio a'i helmed ac mae'n hynod werthfawrogol o'r gefnogaeth mae wedi’i chael gan Chwaraeon Cymru - yn ogystal â’r nawdd gan Advanced Construction Scotland, Cool Performance Racing Simulators a Freezadome.

“Rydw i’n hapus iawn i gario lliwiau Cymru pan rydw i’n rasio ac rydw i’n falch iawn o gael fy nghefnogi gan Chwaraeon Cymru,” meddai. 

“Fel gwlad, mae gan Gymru lawer o amrywiaeth ac mae'n rhagori mewn cymaint o wahanol chwaraeon. Mae'n braf bod rasio ceir i fyny’n uchel yn cael ei gydnabod ochr yn ochr â rygbi, pêl-droed ac athletau.

“Mae'r holl gefnogaeth rydw i'n ei derbyn yn hynod werthfawr, a pho fwyaf o gefnogaeth rydw i’n ei chael, y mwyaf mae'n cymryd y pwysau oddi ar fy mam a ’nhad, sef fy nghefnogwyr mwyaf i wrth gwrs.”

Ac fel y chwaraeon eraill hynny mae Matthew yn eu crybwyll, rhaid i athletwyr trac rasio fod yn hynod ffit i berfformio ar y lefel uchaf mewn chwaraeon moduro.

Mae hyfforddiant corfforol yn y gampfa yr un mor bwysig i yrrwr rasio ag ydyw i athletwr trac a chae. Mae'r straen corfforol ar yrrwr yn enfawr.

Yn wahanol i chwaraeon eraill, fodd bynnag, erbyn hyn mae amrywiaeth enfawr o wahanol lwybrau gyrfa yn wynebu Matthew.

Mae ei gam nesaf yn un pwysig iawn ac yn ddoeth nid yw’n rhuthro i benderfynu pa bencampwriaeth i gystadlu ynddi yn 2022.

“Mae cymaint o opsiynau o ran beth i’w wneud nesaf,” meddai Matthew.

“Fe allwn i aros yn y DU a rasio yn Fformiwla 3, fe allwn i fynd i Ewrop a rasio yn Fformiwla Renault, neu fe allwn i fynd i America a rasio yn Indy Lights.

“Mae'n benderfyniad mor fawr ac fe fyddwn ni'n gweithio ar y manteision a'r anfanteision dros y gaeaf ac yn gwneud penderfyniad cyn diwedd mis Chwefror.”

Felly, cadwch lygad ar y lôn gyflym, gan fod Matthew Rees yn mynd i lefydd ar frys.