Mae arian y Loteri Genedlaethol wedi helpu i sefydlu clwb pêl osgoi cymunedol cyntaf Cymru i blant ym Mhontypridd.
Mae gan Glwb Pêl Osgoi Dreigiau’r Rhondda dîm oedolion ers pum mlynedd, ond mae’r clwb bellach wedi ehangu i ddarparu ar gyfer y niferoedd mawr o blant a hoffai chwarae pêl osgoi y tu allan i’r ysgol.
Dyfarnwyd £770 i’r clwb o Gronfa Cymru Actif Chwaraeon Cymru – sy’n defnyddio arian y Loteri Genedlaethol – i helpu’r adran iau newydd i gael ei sefydlu. Fel clwb newydd, roedden nhw’n gymwys i gael cyllid i dalu am werth deg wythnos o logi neuadd chwaraeon yng Nghanolfan Hamdden Hawthorn, a hefyd fe wnaethon nhw ddefnyddio eu grant i brynu offer newydd ac i dalu am gyrsiau hyfforddi i uwchsgilio eu gwirfoddolwyr.
Mae pêl osgoi wedi bod yn ffefryn mawr mewn ysgolion ers blynyddoedd lawer, a chafodd sgôr uchel yn Arolwg Chwaraeon Ysgol 2022 Chwaraeon Cymru a oedd yn casglu barn plant ledled y wlad am yr hyn maen nhw’n ei hoffi a ddim yn ei hoffi am chwaraeon. Mae canlyniadau'r arolwg yn awgrymu bod 101,000 o blant yng Nghymru a fyddai'n hoffi mwy o gyfleoedd i chwarae pêl osgoi.
Roedd sylfaenydd Clwb Pêl Osgoi Dreigiau’r Rhondda, Scott Esnouf, yn awyddus i fanteisio ar y diddordeb hwnnw drwy roi cyfle i bobl ifanc ymuno â chlwb cymunedol sydd hefyd yn cynnig llwybr iddyn nhw barhau i fwynhau’r gamp fel oedolion.
Dywedodd Scott: “Mae pêl osgoi yn ffefryn mawr mewn ysgolion, felly roeddwn i eisiau sefydlu adran iau yn ein clwb ni ac roedden ni wrth ein bodd yn derbyn cefnogaeth gan Chwaraeon Cymru a’r Loteri Genedlaethol.
"Am yr ychydig fisoedd cyntaf, roedden ni'n cael llond llaw o blant yn rheolaidd, ond fe ddechreuodd popeth o ddifrif ar ôl i ni weithio mewn partneriaeth â Thîm Datblygu Chwaraeon Cyngor Bwrdeistref Sirol Rhondda Cynon Taf, a helpodd i gydlynu sesiynau blasu pêl osgoi yn yr ysgolion cynradd lleol. Roedden nhw’n boblogaidd iawn ac erbyn hyn mae gennym ni fwy nag 20 yn dod yn rheolaidd i’n clwb ni bob dydd Llun.”
