Mae Chwaraeon Cymru wedi ymuno â Savanta ComRes i gael gwybodaeth am arferion ac ymddygiad gweithgarwch y genedl yn ystod Pandemig y Coronafeirws.
Mae’r arolygon, a gynhaliwyd ar adegau gwahanol yn ystod y pandemig, yn rhoi cipolwg ar sut effeithiodd gwahanol gyfyngiadau ar weithgarwch corfforol a chwaraeon, a hefyd agwedd pobl Cymru at ymarfer yn ystod ac ar ôl y cyfyngiadau symud.
Mae’r data wedi cael eu pwysoli i fod yn ddemograffig gynrychioliadol o oedolion 16+ oed Cymru yn ôl rhywedd, oedran a’r amcangyfrif o gartrefi gyda phlant dan 16 oed.
Uchafbwyntiau’r Arolygon 2022
Mae rhai o’r canfyddiadau yn yr arolygon yn cynnwys y canlynol:
- Mae'r defnydd o gyfleusterau dan do wedi parhau i gynyddu gydag 19% o oedolion yn dweud eu bod wedi defnyddio campfa / ystafell ffitrwydd dan do yn ystod yr wythnos flaenorol, ac 16% yn dweud eu bod yn defnyddio pwll nofio dan do.
- Roedd y rhai a oedd yn defnyddio cyfleusterau dan do hefyd yn teimlo'n fwy cyfforddus yn gwneud hynny - dywedodd 92% eu bod wedi teimlo'n gyfforddus yn defnyddio campfa / canolfan ffitrwydd dan do a dywedodd 91% eu bod wedi teimlo'n gyfforddus yn defnyddio pwll nofio dan do.
- Mae hyder ynghylch cymryd rhan wedi cynyddu ar draws yr holl gyfleusterau dan do, fodd bynnag gwelwyd gostyngiad ar gyfer cyfleusterau awyr agored (oherwydd Storm Eunice o bosibl).
- Dywed 6% o oedolion (tua 150,000 o oedolion yn fras) eu bod yn dal i fod wedi oedi neu atal eu rôl wirfoddoli mewn chwaraeon oherwydd Covid-19 / y pandemig.
- Mae cysylltiad cadarn rhwng lefelau gweithgarwch oedolion a ‘hapusrwydd’ a’r rhai sy’n ‘fodlon â’u bywyd’.
- Mae llai na hanner yr oedolion yn cytuno bod digon o gyfleusterau yn eu hardal (47%) a bod y cyfleusterau hyn yn fforddiadwy (41%) ac o ansawdd rhagorol (37%).
- ‘Cael rhywun i fynd gyda nhw’ (14%), tywydd gwell (6%) a gwell iechyd (5%) oedd y pethau roedd oedolion yn teimlo oedd fwyaf tebygol o wneud eu profiad o chwaraeon yn fwy pleserus.
Am fwy o wybodaeth, e-bostiwch insightteam@sport.wales.
