Main Content CTA Title
  1. Hafan
  2. Cronfa Cymru Actif

Cronfa Cymru Actif

Nod Cronfa Cymru Actif yw diogelu, paratoi a sicrhau cynnydd clybiau a sefydliadau chwaraeon cymunedol yng Nghymru drwy bandemig Covid-19 ac i’r dyfodol.

Mae’r gronfa eisoes wedi helpu llawer o glybiau a sefydliadau ledled Cymru i wynebu heriau pandemig y Coronafeirws. Bydd yn parhau i ddarparu cyllid i helpu clybiau i fynd i’r afael â’r heriau hyn, ac i sicrhau cynaliadwyedd am flynyddoedd i ddod. 

Mae’r cyllid o £4 miliwn wedi bod yn bosib drwy arian mae Chwaraeon Cymru yn ei dderbyn gan Lywodraeth Cymru a’r Loteri Genedlaetho.

 

 

Grantiau

Mae tri math o grant ar gael, a phob un yn rhoi sylw i’r gwahanol heriau mae clybiau a sefydliadau yn eu hwynebu. 

 

Os ydych chi’n gwneud cais i’r gronfa, mae’n bwysig eich bod yn dewis y grant cywir ac yn gwneud eich cais yn berthnasol i’r grant hwnnw. 

 

1. DIOGELU

 

I helpu i ddiogelu clybiau a sefydliadau cymunedol neu grwpiau sy’n wynebu risg ariannol ar unwaith o ganlyniad i bandemig Covid-19. 

Nod y grant yw helpu sefydliadau sy’n methu cyflawni eu rhwymedigaethau ariannol oherwydd Covid-19. Er enghraifft, i dalu costau sefydlog (e.e. rhent a chyfleustodau) nad ydynt yn cael eu talu gan refeniw mwyach. 

Bydd grantiau o £300 i £5,000 ar gael ar gyfer cefnogaeth argyfwng.

 

2. PARATOI 

 

I helpu i baratoi clybiau a sefydliadau cymunedol fel ymateb uniongyrchol i Covid-19. 

Nod y grant yw ailddechrau chwaraeon a gweithgarwch neu ddatblygu cyfranogiad.

Mae grantiau paratoi o £300 i £50,000* ar gael.

*Ar gyfer grantiau mwy na £5,000, bydd rhaid i chi wneud cyfraniad o 15% (o gyllid y clwb ei hun neu grantiau o rywle arall).

D.S. Nid yw hwn yn grant datblygu cyffredinol – rhaid i’r ceisiadau fod fel ymateb uniongyrchol i Covid-19.

 

3. CYNNYDD 

 

I helpu gyda chynnydd chwaraeon a gweithgarwch i'r cam nesaf a chefnogi cynaliadwyedd tymor hir.

Nod y grant yma yw helpu clybiau a sefydliadau cymunedol gyda’r canlynol:

  • Trechu anghydraddoldeb
  • Creu atebion tymor hir i fod yn fwy cynaliadwy
  • Gweithredu’n arloesol

Mae grantiau o £300 i £50,000* ar gael.

*Bydd rhaid i chi wneud cyfraniad o 10% ar gyfer grantiau mwy na 10k neu 20% os ydynt yn fwy na £25k. 

 

CYN GWNEUD CAIS – BETH DDYLECH EI WNEUD

I wneud eich cais yn un cadarn a chynyddu eich siawns o lwyddo, mae’n bwysig eich bod yn deall yn llawn beth yw cynnwys pob grant a beth yw’r meini prawf.

 

Mae ceisiadau’n fwy tebygol o lwyddo os ydynt yn gwneud y canlynol:

  • Dewis y grant perthnasol i anghenion y clwb. Mae llawer o’r ceisiadau rydym yn gorfod eu gwrthod wedi dewis y grant anghywir.
  • Mynegi sut bydd yr eitemau mae’r clwb eisiau arian ar eu cyfer yn cyflawni amcanion a meini prawf y grant.

 

Rydym yn argymell eich bod yn cymryd y camau canlynol cyn gwneud cais:

  1. Darllen yr holl dudalennau perthnasol ar y we, gan gynnwys y dudalen yma a’r tudalennau ar gyfer pob grant sydd wedi’i restru isod.
  2. Darllen drwy gwestiynau cyffredin y Ganolfan Gymorth a gofyn unrhyw gwestiynau ychwanegol sydd gennych chi.
  3. Ystyried sut gallai sefydliadau cefnogi eich helpu chi gyda’r broses ymgeisio.

 

 

Ffynonellau o gefnogaeth

 

Y GANOLFAN CYMORTH

 

Gallwch glicio ar y botwm ‘Help’ ar waelod y dudalen ar unrhyw adeg i chwilio am ateb neu gysylltu â ni. Rydym yn argymell eich bod yn darllen yr adrannau yn y Ganolfan Cymorth cyn dechrau gwneud eich cais.

 

ATEBION CLWB

 

Atebion Clwb yw ein hadnodd ni i gefnogi gwirfoddolwyr a chlybiau yng Nghymru. Mae’n cynnwys cyngor i helpu clybiau i weithredu’n effeithiol a datblygu, a allai fod yn ddefnyddiol yn eich cais. Hefyd mae cyfeiriadau at Atebion Clwb drwy’r ffurflen gais i gyd.  

Os bydd grant o fwy na £5,000 yn cael ei gymeradwyo i chi, bydd rhaid i chi gwblhau asesiad clwb Atebion Clwb (yn ystod y flwyddyn ddiwethaf) er mwyn i’r cyllid gael ei ryddhau i chi.

 

SEFYDLIADAU CEFNOGI

 

Mae sefydliadau cefnogi amrywiol a all eich cefnogi chi, gan gynnwys Awdurdodau Lleol a Chyrff Rheoli Cenedlaethol. Rydym yn argymell yn gryf eich bod yn gofyn am arweiniad gan eich corff rheoli neu adran datblygu chwaraeon eich awdurdod lleol wrth wneud eich cais.

Dilynwch y dolenni isod i gael gwybod mwy am bob grant ac i wneud cais.  


sut i gysylltu â ni

 

Cofiwch nad ydym yn gallu ateb ymholiadau’r Grant Cynnydd dros y ffôn, oherwydd capasiti a gweithio o bell. 

Defnyddiwch y Ganolfan Cymorth neu anfon eich ymholiad ar e-bost beactive@sport.wales